សារព័ត៌មាន នគរវត្ត តែងតែនាំមុខគេជានិច្ច
ភ្នំពេញៈ បុរសម្នាក់ជាអ្នករត់ម៉ូតូកង់បានដួលដាច់ខ្យល់ស្លាប់ នៅនឹងកន្លែងកើតហេតុ ដោយមិនដឹងមូលហេតុ ។
ហេតុការណ៍នេះ បង្កអោយមានការភ្ញាក់ផ្អើលកាលពីវេលាម៉ោង៧យប់ ថ្ងៃទី៧ ខែកុម្ភៈ ឆ្នាំ២០១៧ តាមបណ្តោយផ្លូវ១០៦នៅចំណុចជាប់នឹងផ្សាររាត្រីស្ថិតនៅក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។
ជនរងគ្រោះមានឈ្មោះ ប៉ុល កុសល ភេទប្រុស អាយុ៤៥ឆ្នាំ មានមុខរបរអ្នករត់ម៉ូតូកង់បី ស្នាក់នៅសង្កាត់វត្តភ្នំ ខណ្ឌដូនពេញ ជិតផ្សាររាត្រី មានស្រុកកំណើតនៅឃុំដំបូលខ្ពស់ ស្រុកអង្គរជ័យ ខេត្តកំពត។
បើតាមប្រភពពត៌មានពីកន្លែងកើតហេតុបានអោយដឹងថា មុនពេលកើតហេតុ គេបានឃើញជនរងគ្រោះគាត់ជាអ្នករត់ម៉ូតូកង់បី ហើយគាត់រត់រ៉ឺម៉កកង់បីជាប្រចាំនៅផ្សាររាត្រី តែមិនដឹងយ៉ាងម៉េច ស្រាប់តែឃើញគាត់បណ្តើរម៉ូតូ មួយសន្ទុះក្រោយមក ក៏ស្រាប់តែឃើញជនរងគ្រោះដួលសន្លប់ភ្លាមៗនោះដែរ ប្រជាពលរដ្ឋ និងអ្នកលក់ដូរនៅក្បែរនោះ បាននាំគ្នាជួយសង្គ្រោះដែរ តែជនរងគ្រោះបានដាច់ខ្យល់ស្លាប់បាត់ទៅហើយ ភ្លាមៗនោះ ក៏បានទាក់ទងទៅសមត្ថកិច្ចមូលដ្នានឱ្យមកមើល ហើយសមត្ថកិច្ចជំនាញ់ក៏បានចុះមកធ្វើកោសល្យវិច័យផងដែរ ។
បន្ទាប់ពីសមត្ថកិច្ចជំនាញ់បានចុះមកធ្វើកោសល្យវិច័យរួចមក ក្រុមអ្នកសារព័ត៌មានបានទៅសួរនាំ ប៉ុន្តែខាងក្រុមមន្រ្តីជំនាញបានបង្ហើបប្រាប់ថា បុរសរងគ្រោះដែលបានស្លាប់ខាងលើ ដោយសារតែខ្យល់គរ ហើយដាច់សរសៃឈាមពីទ្រូងខាងស្តាំ ។
ក្រោយពេលកើតហេតុសពជនរងគ្រោះត្រូវសាច់ញ្ញាតិបងប្អូនយកទៅបុណ្យនៅស្រុកកំណើតខេត្តកំពត ៕ ស រស្មី
