ជនជាតិបរទេសផឹកសីុស្រវឹងបង្កហិង្សាវាយតប់គ្នារងរបួសធ្ងន់ម្នាក់

ភ្នំពេញ៖ បុរសជាជនជាតិបរទេសម្នាក់ បានរងរបួសធ្ងន់ត្រូវបានរថយន្តសង្គ្រោះដឹកទៅមន្ទីរពេទ្យ ខណៈផឹកសីុមិត្តភក្តិហើយទំនាស់ពាក្យសំដីគ្នាផ្ទុះហិង្សាវាយតប់គ្នា បង្កភ្ញាក់ផ្អើលពេញហាង កាលពីវេលាម៉ោង១១និង៣០នាទីយប់ ថ្ងៃទី២៣ ខែកុម្ភៈ ឆ្នាំ២០១៧ នៅចំណុចហាងផឹកសីុមួយកន្លែងយីហោ Eye of the mekong តាមបណ្តោយផ្លូវលេខ១១០ ស្ថិតក្នុងសង្កាត់ផ្សារកណ្តាល១ ខណ្ឌដូនពេញ ក្រោយកើតហេតុជនបង្កគេចខ្លួនបាត់ ។

តាមសាក្សីនៅកន្លែងកើតហេតុបានអោយដឹងថា នៅមុនពេលកើតហេតុគេបានឃើញបុរស៣នាក់ ជាជនជាតិបរទេសអង្គុយផឹកសីុនៅហាងខាងលើ ក្រោយមកក៏កើតជាជម្លោះនឹងគ្នា ស្រាប់តែបុរសម្នាក់ស្ទុះទៅវាយជនរងគ្រោះមួយដៃ ធ្វើអោយជនរងគ្រោះរត់ចេញមកក្រៅហើយត្រូវបុរសម្នាក់ទៀតដែលអង្គុយផឹកសីុជាមួយគ្នាដែរនោះរត់តាមហក់ទាន់មួយជើងទៀត បណ្តាលអោយជនរងគ្រោះដួលបោកក្បាលទៅនឹងថ្នល់រងរបួសធ្ងន់ ។

ក្រោយមក ជនបង្កបានរត់គេចខ្លួនបាត់ភ្លាមនោះ សមត្ថកិច្ចបានចុះមកដល់ចំណុចកើតហេតុ និងហៅរថយន្តសង្គ្រោះដឹកទៅមន្ទីរពេទ្យភ្លាមៗដើម្បីព្យាបាលរបួស ៕ សុខាសែនជ័យ