សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រោយបាតមុខមួយរយៈពេលខ្លី តារាសម្តែងស្រី ភិន សុដាលីសបានបង្ហាញវត្តមានជាថ្មីក្នុងភាពយន្តភាគថ្មីរបស់ទូរទស្សន៍PNNគឺរឿង”ម្ចាស់បំណុល”។ ក្នុងរឿងថ្មីដែលផលិតដោយផលិតកម្មមហាហង្សនេះនាងនឹងត្រូវជួបជាមួយដៃគូសម្តែងចាស់គឺលោកភឹម តារាវិបុល។
ការបញ្ជាក់នេះ ត្រូវបានធ្វើឡើងក្នុងពិធីក្រុងពាលីចេញថតភាពយន្តភាគថ្មីខាងលើកាលពីព្រឹកថ្ងៃ២ មីនា ក្រោមវត្តមានផលិតករ និងសិល្បករជាច្រើនរូបចូលរួម។
លោក ភឹម តារាវិបុលបានបញ្ជាក់ថា នេះគឺជារឿងទី៤ ហើយដែលលោកបានសម្តែងរួមគ្នាជាមួយនឹង ភិន សុដាលីស មានដូចជារឿង”អច្ឆរិយៈស្នេហ៍” រឿង”ឆ្អែតចិត្ត” រឿង”ខ្មោចទឹក” និងរឿងចុងក្រោយគឺរឿង«ម្ចាស់បំណុល»នេះ។ លោកថាក្នុងរឿងនេះលោកសម្តែងជាតួអង្គបុរសអ្នកជំនួញមកពីក្រៅប្រទេសដោយចរិកម៉ឺងម៉ាត់នឹងការងារ។ លោកថារឿងនេះប្លែកពីរឿងមុនៗហើយលោករំពឹងថាទទួលបានការគាំទ្រច្រើនពីទស្សនិកជនព្រោះតែសាច់រឿង និងបច្ចេកទេសផលិតត្រូវបានសម្រិតសម្រាំងខ្ពស់ និងមានឈុតឆាកប្រទាក់ក្រឡាគ្នាច្រើន។ តារាសម្តែងប្រុសវ័យ៣០ឆ្នាំរូបនេះបញ្ជាក់ដែរថា នឹងមិនមានបញ្ហានៃការសម្តែងរួមជាមួយគ្នាទេព្រោះតែលោក និងភិន សុដាលីសស្គាល់គ្នាជាយូ ហើយជាដៃគូសម្តែងចាស់ដែលយល់ចិត្តគ្នាច្រើន ។
អ្នកនាងភិន ដាលីស និយាយថា ខ្សែរឿង «ម្ចាស់បំណុល» ជារឿងថ្មី ចំណុចខ្លាំងច្រើន ទើបនាងរំពឹងមិនអន់នោះទេ ថារឿងដែលនាងទទួលសម្ដែងមួយនេះនឹងជួយឲ្យនាងឡើងកូដ។នាងត្រូវសម្ដែងមានចរឹតខុសប្លែកពីរឿងមុនៗគឺចរឹតកាចឆ្នាស់និងកម្សត់ទឹកភ្នែកគឺមានទាំងអស់ដោយក្នុងរឿងនេះក៏ត្រូវសម្ដែងពិបាកច្រើនដែរទើបនាងប្រកាសថាមួយរឿងនេះពិតជាធ្វើឲ្យនាងល្បី។
អគ្គនាយកផលិតកម្មមហាហង្ស លោក អ៊ិន សុភិនបានបញ្ជាក់ថា ភាពយន្តនេះនឹងក្លាយជាភាពយន្តទី២ របស់ផលិតកម្មលោកផលិតឲ្យទូរទស្សន៍PNNបន្ទាប់ពីរឿង”បំភ្លេចមិនបាន”ដែលកំពុងចាក់បញ្ចាំង។ លោកថាជារឿងថ្មីមានគ្រប់រសជាតិ ត្រូវបាននិពន្ធ និងដឹកនាំដោយសម្រិតសម្រាំងដើម្បីប្រាកដថាជារឿងដែលអាចប្រកួតប្រជែងជាមួយភាពយន្តដទៃទៀតបាន។ លោកថា រឿងនេះមានរហូតដល៥០ភាគដែលការចំណយខ្ពស់ក្នុងមួយភាគប្រមាណ៣ពាន់ដុល្លារអាមេរិក និងចំណាយការថតប្រមាណ៥ខែ។ លោករំពឹងខ្ពស់ថាវានឹងក្លាយជាភាពយន្តដែលអាចឲ្យអ្នកទស្សនាជក់ចិត្តនិងចង់តាមដានពីមួយភាគទៅមួយភាគ។
ក្រៅពីតារាសម្តែងពីររូបខាងលើភាពយន្តនេះ ត្រូវបានចូលរួមសម្តែងដោយតារាជាច្រើនរូបផ្សេងទៀតដូចជា លោក ហង្ស សម្បើមស័ក្កិ កញ្ញា សឿន ផានផាភួង កញ្ញា រ៉ាផា លោក ថម មី កញ្ញាហង្ស រស្មី កញ្ញា សម្ផស្ស អ្នកស្រីពៅ ថាវី លោក ហម ឈរ៉ាជាដើម៕ វឌ្ឍនា
