សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជន៣នាក់ភ័យពេក ក៏ជ្រុលចង្កូតម៉ូតូទៅបុកដើមឈើមួយដើម បណ្តាលឲ្យយុវជនម្នាក់ដួលបោកក្បាលស្លាប់ និង២នាក់ទៀតរបួសធ្ងន់ ខណៈដែលពួកគេជិះមូ៉តូរត់គេចពីក្រុមក្មេងស្ទាវមួយក្រុមបានជិះម៉ូតូ៤ គ្រឿងដេញវាយ និងប្រដាប់ដោយដាវសាំម៉ូរៃគ្រប់ដៃ តាមកាប់ ដោយមិនដឹងមូលហេតុ ។
ហេតុការណ៍នេះបង្កឲ្យភ្ញាក់ផ្អើលនៅវេលាម៉ោងរំលងអធ្រាត្រ ឈានចូលថ្ងៃទី១៩ ខែមីនា ឆ្នាំ២០១៧ ស្ថិតនៅចំណុចបណ្ដោយផ្លូវម៉ៅសេទុង សង្កាត់ទំនប់ទឹក ខណ្ឌចំកាមន រាជធានីភ្នំពេញ។
ប្រភពពីយុវជនម្នាក់ដែលជាមិត្តភក្តិរបស់ជនរងគ្រោះ បានប្រាប់ឲ្យដឹងថា មុនពេលកើតហេតុ ពួកខ្លួនបានជិះម៉ូតូចេញពីផ្ទះដើរលេងនៅកោះពេជ្រ ដោយមានគ្នា៩នាក់ ជិះម៉ូតូ៤គ្រឿង តាមផ្លូវម៉ៅសេទុង ក្នុងទិសដៅពីជើងទៅត្បូង ស្រាប់តែមកដល់ចំណុចស្តុបកាវដាយ ក៏បានជួប ក្រុមក្មេងមួយក្រុមទៀត ដោយពួកគេមានគ្នាជាង១០នាក់ ប្រដាប់ដោយដាវសាំម៉ូរ៉ៃគ្រប់ដៃ បានជិះម៉ូតូដេញតាមកាប់ពួកខ្លួនអត់ដឹងមូលហេតុ ។ ភ្លាមៗនោះ ពួកខ្លួន និងមិត្តភក្តិភ័យពេក ក៏ជិះម៉ូតូរត់គេច ព្រោះខ្លាចក្រុមខាងលើនោះ ដេញកាប់មកលើពួកខ្លួន ស្រាប់តែជនរងគ្រោះខាងលើឈ្មោះ អុក ដែលជិះម៉ូតូនិច មួយគ្រឿងពណ៌ ស ពាក់ស្លាកលេខ ភ្នំពេញ 1FT-4928 ដោយឌុបគ្នា២នាក់ទៀត បានបន្ថែមល្បឿនគេចខ្លួន ខណៈមកដល់ចំណុចកើតហេតុខាងលើ សង្ស័យជនរងគ្រោះភ័យពេក ក៏ជ្រុលចង្កូតទៅបុកដើមឈើមួយដើមនៅលើចិញ្ចើមផ្លូវពេញទំហឹង បណ្តាលឲ្យអ្នកដែលកាន់ចង្កួចមូ៉តូបានហោះផ្លោងបោកក្បាលស្លាប់ភ្លាមៗនៅនឹងកន្លែងកើតហេតុ ចំណែក២នាក់ទៀត រងរបួសធ្ងន់ ត្រូវបានរថយន្តសង្គ្រោះបន្ទាន់ដឹកយកសង្រ្គោះ ផងដែរ ។ ដោយឡែក ក្រុមស្ទាវបង្កនោះ ក៏បានជិះម៉ូតូគេចខ្លួនបាត់ស្រមោលអស់ ។
ក្រោយពេលកើតហេតុ សមត្ថកិច្ចបានចុះដល់កន្លែងហេតុ និងព្យាយាមទំនាក់ទំនងក្រុមគ្រួសារឲ្យមកទទួលយកសពទៅធ្វើបុណ្យតាមប្រពៃណី ចំណែកម៉ូតូរបស់ជនរងគ្រោះ ក៏ត្រូវសមត្ថកិច្ចយកទៅរក្សាទុករង់ចាំបងប្អូនរបស់ជនរងគ្រោះមកទទួលយក ៕ ស រស្មី
