សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ រថយន្តមួយគ្រឿងបានបុកគោយន្តពីក្រោយបណ្តាលឲ្យខ្ទេចមុខរថយន្តដែលមនុស្សជិះនៅលើរថយន្តគ្រាន់តែរងរបួសស្រាលប៉ុណ្ណោះ។
គ្រោះថ្នាក់ចរាចរណ៍នេះបានកើតឡើងនៅវេលាម៉ោង៧និង៣០នាទីយប់ថ្ងៃទី៦ ខែមេសា ឆ្នាំ២០១៧ នៅចន្លោះគីឡូម៉ែត្រ១៦២-១៦៣ ស្ថិតនៅភូមិតានៃ ឃុំជើងគោ ស្រុកព្រៃនប់ ខេត្តព្រះសីហនុ។
តាមរបាយការណ៍នគរបាលស្រុកឲ្យដឹងថា ករណីគ្រោះថ្នាក់ចរាចរណ៍នេះបានបណ្តាលឲ្យអ្នកបើករថយន្តនិងអ្នករួមដំណើរ៤នាក់រងរបួសស្រាល។ អ្នកបើកបរឈ្មោះដែន ដារា ភេទប្រុស អាយុ២៦ឆ្នាំ មានទីលំនៅភូមិ៣ សង្កាត់លេខ៣ ក្រុង-ខេត្តព្រះសីហនុ រីឯអ្នករួមដំណើរ៤នាក់ ទី១ឈ្មោះអាន់ លីន ភេទ ប្រុស អាយុ៣២ឆ្នាំ សញ្ជាតិឥណ្ឌូនេស៊ី ទី២ឈ្នោះយិន ស៊ិន ភេទប្រុស អាយុ៣៣ឆ្នាំ សញ្ជាតិ ឥណ្ឌូនេស៊ី ទី៣ឈ្មោះហ្វែន ទី ភេទស្រី អាយុ២៥ឆ្នាំ សញ្ជាតិឥណ្ឌូនេស៊ី និងទី៤ឈ្មោះស៊ូ កំដរ ភេទប្រុស អាយុ៣៩ឆ្នាំ សញ្ជាតិឥណ្ឌូនេស៊ី ។ រថយន្តដែលបុកគោយន្តម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខភ្នំពេញ2AE-9016 រីឯគោយន្តម៉ាកToTo សណ្តោងរ៉ឺម៉ក គ្មានស្លាកលេខ ហើយក្រោយពីកើតហេតុអ្នកបើកគោយន្តបានគេចខ្លួនពីកន្លែងកើតហេតុ។
ប្រភពនៅកន្លែងកើតហេតុបានឲ្យដឹងថា នៅមុខពេលកើតហេតុរថយន្តបានធ្វើដំណើរពីកើតទៅលិច(ពីភ្នំពេញទៅខេត្តព្រះសីហនុ)លុះមកដល់ចំណុចកើតហេតុបានបុកគោយន្តពីក្រោយតែម្តង។ កាលដែលអ្នកបើកបរគោយន្តរត់គេចខ្លួនព្រោះតែដឹងខ្លួនថា គោយន្តខាងលើនេះមិនមានបំពាក់ភ្លើងនិងចំណាំផ្លាកដើម្បីជាសញ្ញាឲ្យដឹងអ្នកបើករថយន្តបានឃើញ ទើបបណ្តាលឲ្យកើតហេតុមានគ្រោះថ្នាក់បែបនេះ។
បច្ចុប្បន្នក្រោយកើតហេតុគោយន្តនិងរថយន្តត្រូវបានសមត្ថកិច្ចបញ្ជូនទៅរក្សាទុកនៅអធិការដ្ឋាននគរបាលស្រុកព្រៃនប់រង់ចាំដោះស្រាយជាក្រោយ៕ ឆ្លាម សមុទ្រ
