សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរស ២នាក់ ខឹងរថយន្តមួយគ្រឿង ដែលបើកកៀរម៉ូតូពួកគេឲ្យដួលពេលជិះ ចេញពីផឹកនៅក្លឹបកម្សាន្តមួយកន្លែងត្រឡប់ផ្ទះវិញបានបណ្តាលឲ្យដួល ហើយរថយន្តនោះអត់ឈប់ ធ្វើ
ឲ្យពួកគេជិះម៉ូតូយកដុំថ្មដេញគប់ទៅលើរថយន្តវិញ បណ្តាលឲ្យមានស្នាមប្រេះកញ្ចក់បន្តិច ទើបម្ចាស់រថយន្តប្តឹងសមត្ថកិច្ចឲ្យឃាត់ខ្លួនទាំងពីរនាក់តែម្តង ។
ហេតុការណ៍នេះកើតឡើងនៅវេលាម៉ោង២រំលងអធ្រាត្រ ឈានចូលថ្ងៃទី១២ ខែមេសា ឆ្នាំ២០១៧ នៅទល់មុខហាងខារ៉ាអូខេកូឡូសូ ផ្លូវលេខ៣៦០ សង្កាត់បឹងកេងកង៣ ខណ្ឌចំការមន ។
អ្នកបើកបររថយន្តដែលថ្លែងដោយ សុំមិនបញ្ចេញឈ្មោះបានឲ្យដឹងថា នៅមុនពេលកើតហេតុ រូបគាត់បានបើករថយន្ត តាក់ស៊ី កាមរី ហាយប្រីត ពណ៌ស អត់មានស្លាកលេខ ត្រឡប់មកពីជួនភ្ញៀវវិញនៅម្ដុំ ស្តុបផ្សារដេប៉ូ ដោយបានធ្វើដំណើរតាមផ្លូវលេខ ២១៥ ក្នុងទិសដៅ ពីលិចទៅកើត។លុះមកកន្លែងកើតហេតុ ស្រាប់តែមានបុរសពីរនាក់អាយុជាង២០ឆ្នាំ បានជិះម៉ូតូម៉ាក YAMAHA FINO ពណ៌ខ្មៅលាយផ្កាឈូក ដេញតាមពីក្រោយរថយន្តរបស់គាត់ រួចពួកគេបាន យកដុំថ្ម មកគប់រថយន្តរបស់គាត់បណ្តាលឲ្យមានស្នាមប្រេះកញ្ចក់បន្តិច ។បន្ទាប់មកពួកគេបានព្យាយាមបើកម៉ូតូរត់គេច រហូតដល់មុខតុលាការយោធា ផ្លូវ៦៣០សង្កាត់ទួលស្វាយព្រៃ១ ខណ្ឌចំការមន ទើបគាត់បានដេញទាន់ រួចហើយឃាត់ខ្លួនឲ្យនគរបាលយកទៅសាកសួរនៅប៉ុស្តិ៍នគរបាល បឹងកេងកង៣ តែម្តង។
សមត្ថកិច្ចបានឲ្យដឹងពេលសាកសួរបុរសទាំងពីរនាក់នេះ ពួកគេបាននិយាយថា ពួកគេទាំងពីរនាក់បានចេញពីក្លឹបកម្សាន្ត RCA ដែលស្ថិតនៅផ្លូវលេខ 310 សង្កាត់បឹងកេងកង១ ខណ្ឌចំការមនក្នុង គោលបំណងត្រឡប់ទៅផ្ទះវិញនៅម្ដុំផ្សារដេប៉ូ ដោយបានជិះម៉ូតូ ធ្វើដំណើរតាមផ្លូវលេខ២១៥ក្នុងទិសដៅពីកើតទៅលិច។លុះ មកដល់ស្តុបផ្សារដេប៉ូ ក៍ស្រាប់តែរថយន្តហាយប្រ៊ីតនេះបានបើកមកកៀរគេទាំងពីរនាក់ បណ្តាលឲ្យដួល រងរបួសរលាត់ដៃជើងតិចតួច។ដោយសារអ្នកបើកបររថយន្តមិន ឈប់ដោះស្រាយបែរជាព្យាយាមបើករត់គេច ធ្វើឲ្យពួកគេខឹងនាំគ្នាជិះម៉ូតូដេញពីក្រោយរហូតទាន់នៅចំណុចខាងលើក៏ យកដុំថ្មគប់រថយន្តនោះ តែម្ដងទៅ ។
ពេលនោះដែរ ខាងរថយន្តវិញបានប្រាប់ថា ប្រសិនបើជារូបគេ បើករថយន្តកៀរម៉ូតូនេះមែនគេបើករថយន្តគេខ្លួនបាត់ទៅហើយ មិនបាច់ឲ្យអ្នកទាំងពីរ ដេញគប់រថយន្តយ៉ាងនេះទេ ។
ក្នុងដំណោះស្រាយនេះខាងរថយន្តបានទាមទារសំណង ចំនួន ៥ពាន់ដុល្លារ តែខាងម៉ូតូអត់លុយបានឲ្យតែ ១០ដុល្លារ ហើយការសម្របសម្រួល គ្នានេះមិនត្រូវទើបសមត្ថកិច្ចសម្រេចបញ្ជូនខ្លួនគេទាំងអស់ទៅអធិការដ្ឋាននគរបាលខណ្ឌចំការមន ដើម្បីដោះស្រាយបន្ត ៕ ប្រាថ្នា
