សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងនគរបាលខណ្ឌមានជ័យបាន ចាប់ឃាត់ខ្លួនស្រ្តីម្នាក់កាលពីថ្ងៃទី១៨ ខែមេសា ឆ្នាំ២០១៧ វេលាម៉ោង៨និង៥០នាទី យប់ នៅចំណុចសំណង់មិនរៀបរយ ផ្លូវ៦០ម៉ែត្រ ក្រុមទី០៨ ភូមិ ព្រែកតាគង់ សង្កាត់ ចាក់អង្រែលើ ខណ្ឌមានជ័យ ពាក់ព័ន្ធករណី ជួញដូរគ្រឿងញៀន។ លោក ម៉េង វិមានតារា អធិការរងនគរបាលខណ្ឌមានជ័យបាននិយាយថា កម្លាំងល្បាតនគរបាលប៉ុស្តិ៍ចាក់អង្រែលើបានសហការជាមួយកម្លាំងល្បាតនគរបាលខណ្ឌមានជ័បានធ្វើការល្បាតពួនស្ទាក់ក្នុងមូលដ្ឋានហើយបានឃាត់ខ្លួនជនសង្ស័យ ១ នាក់ ពីបទជួញដូរដោយខុសច្បាប់នូវសារធាតុញៀន ឈ្មោះ សាន ស្រីទូច ភេទ ស្រី អាយុ ២៤ ឆ្នាំ ជនជាតិ ខ្មែរ មុខរបរ មិនពិតប្រាកដ ទីលំនៅផ្ទះគ្មានលេខ ផ្លូវលេខ២៧១ ភូមិ ៧ សង្កាត់ចាក់អង្រែលើ ខណ្ឌមានជ័យ។
ក្នុងនោះសមត្ថកិច្ចបានដកហូតវត្ថុតាងរួមមាន៖ ក្រាមពណ៍សថ្លាពីជនសង្ស័យជាគ្រឿងញៀនចំនួន១៧កញ្ចប់ថង់តូចកាបូបស្ពាយពណ៍ខ្មៅ១និងទូរស័ព្ទដៃចាស់១គ្រឿង។
បច្ចុប្បន្នជនសង្ស័យខាងលើឃាត់ខ្លួននៅអធិការដ្ឋាន ដើម្បីកសាងសំណុំរឿងបញ្ជូន ទៅកាន់តុលាការ ៕ តាឡឹម
