ស្រី្តវ័យចំណាស់ត្រូវចោរឆក់កាបូបលុយអស់ជាង៥០០ដុល្លារជិះដេញតាមបុករថយន្តរបួសធ្ងន់

ភ្នំពេញ៖ ស្រ្តីវ័យចំណាស់ម្នាក់ជាអ្នកលក់បន្លែខណៈកំពុងជិះម៉ូតូទៅទិញបន្លែ ត្រូវជនសង្ស័យ៤នាក់ឆក់កាបូបលុយអស់ជាង៥០០ដុល្លារខឹងពេកខំ ជិះម៉ូតូដេញតាមក្រុមជនសង្ស័យហើយជ្រុលទៅបុករថយន្តគេបណ្តាលឲ្យដួលម៉ូតូរងរបួសធ្ងន់ ចំណែក កាបូបឆក់យកកាបូបទៅបាត់។

ហេតុការណ៍នេះ កើតឡើងនៅវេលាម៉ោង៥និង៤០នាទី ទៀបភ្លឺឈានចូលថ្ងៃទី២០ ខែមេសា ឆ្នាំ២០១៧ នៅក្បែរវិទ្យាល័យទួលស្វាយព្រៃ តាមផ្លូវ១៩៩កែងផ្លូវ៣៤៨ សង្កាត់ទួលស្វាយព្រៃទី២ ខណ្ឌចំការមន ។

ស្រី្តរងគ្រោះត្រូវបានគេឈ្មោះ ស្រីហេង ភេទស្រី អាយុ ៥១ឆ្នាំ មុខរបរអ្នកលក់បន្លែ ស្នាក់នៅ សង្កាត់បឹងទំពុន ខណ្ឌមានជ័យ ជិះម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1FJ 2331 ចំណែកជនសង្ស័យមានគ្នា ៤នាក់ ជិះ២ម៉ូតូគ្រឿង មិនចាំម៉ាក ។

ស្រី្តរងគ្រោះបានឲ្យដឹងថា មុនពេលកើតហេតុ គាត់ជិះម៉ូតូតាមផ្លូវលេខ១៩៩ក្នុងទិសដៅពីផ្សារអូឡាំពិក ទៅវិទ្យាល័យទួលស្វាយព្រៃក្នុង គោលបំណងទៅទិញបន្លែនៅផ្សារដើមគយកទៅលក់។ លុះជិះ មកដល់ចំណុចកើតហេតុខាងលើ ស្រាប់តែមានជនសង្ស័យគ្នា ៤នាក់បានធ្វើសកម្មភាពឆក់កាបូប លុយដែលមានប្រាក់រៀល និងប្រាក់ដុល្លារសរុបទាំងអស់ជាង ៥០០ដុល្លារសហរដ្ឋអាមេរិកដែលគាត់ដាក់ចន្លោះភ្លៅយកទៅបាត់ ។

ស្រី្តរងគ្រោះបន្តថា ភ្លាមៗនោះគាត់បានស្រែកឲ្យគេជួយ ហើយបានជិះម៉ូតូដេញតាមជនសង្ស័យក្នុងល្បឿនលឿនបានប្រហែលជាង៥០ម៉ែត្រក៏ បានរេចង្កូតទៅបុករថយន្តម៉ាក SIENNA ពណ៌ស្ករមួយគ្រឿង ពាក់ស្លាកលេខភ្នំពេញ 1AN 2612 ដែលបើកបរក្នុងទិសដៅច្រាស់គ្នា បណ្តាលឲ្យដួលរងរបួសធ្ងន់។

សាក្សីនិយាយថា ជនរងគ្រោះបានសន្លប់មួយសន្ទុះធំទាល់តែរថយន្តសង្គ្រោះរបស់គ្លីនិកឯកជនមកដល់ ដឹកយកទៅសង្គ្រោះទើបដឹងខ្លួនឡើងវិញ ។

ក្រោយពេលកើតហេតុ នគរបាលចរាចរខណ្ឌចំការមនបានប្រាប់ថា គ្រោះថ្នាក់ចរាចរណ៍រវាងម៉ូតូហុងដាឌ្រីមបើកបរដោយស្រ្តីបុករថយន្តម៉ាក SIENNA បាន វាស់វែងរួចយករក្សាទុកនៅអធិការដ្ឋាននគរបាលខណ្ឌចំការមនជាបណ្ដោះអាសន្នសិន រង់ចាំដោះស្រី្តរងគ្រោះជាសះស្បើយរបួសទើបដោះស្រាយពេលក្រោយ ៕ ប្រាថ្នា