សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់រើសបានស្បោងខ្មៅមួយ ពេលបើកមើលស្រាប់តែប្រទះឃើញសុទ្ធតែក្រដាសប្រាក់១០០ដុល្លារ រាប់រយសន្លឹក ដែលក្រោយមកត្រូវគេដឹងថា លុយទាំងនោះមានសរុប១០ម៉ឺនដុល្លារ បន្ទាប់ពីបុរសម្នាក់បានជ្រុះ ក្នុងករណីហេតុការណ៍គ្រោះថ្នាក់ចរាចរណ៍ ហើយរថយន្តសង្គ្រោះបន្ទាន់បានដឹកម្ចាស់លុយរងរបួសទៅកាន់មន្ទីរពេទ្យ ។
លុយទាំង១០ម៉ឺនដុល្លារនេះ មិនអាចញាំងឲ្យទឹកចិត្តបុរសម្នាក់នោះលោភលន់ ញាប់ញ័រចង់បាននោះឡើយ ។ ផ្ទុយទៅវិញ លោកបានកាន់ស្បោងលុយនោះជាប់ ហើយបាននិយាយប្រាប់សមត្ថកិច្ចទាក់ទងទៅជនរងគ្រោះប្រគល់ឲ្យម្ចាស់ដើមគេវិញ ។ នេះពិតជាមនុស្សម្នាក់ក្នុងចំណោម១លានកម្រជួបមែន ។
សេចក្តីរាយការណ៍ឲ្យដឹងថា បុរសម្នាក់ជិះម៉ូតូមកពីបើកលុយនៅធនាគារចំនួន១០ម៉ឺនដុល្លារបានជិះជែងរថយន្តមួយគ្រឿងជ្រុលទៅបុករ៉ឺម៉កម៉ូតូបណ្តាលឲ្យបែកក្បាល និងជ្រុះថង់លុយនៅកណ្តាលផ្លូវកាលពីវេលាម៉ោង៨និង២០នាទីយប់ថ្ងៃទី២៧ ខែមេសា ឆ្នាំ២០១៧ តាមបណ្តោយផ្លូវ២៣០ សង្កាត់បឹងសាឡាង ខណ្ឌទួលគោក ។
មុនពេលកើតហេតុ បុរសម្នាក់ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ស៊េរីឆ្នាំ២០០០ ពាក់ស្លាកលេខ ថ 9733 ភព១ បើកបរក្នុងទិសដៅពីកើតទៅលិច ចំណែកឯរ៉ឺម៉កម៉ូតូបើកបរក្នុងទិសដៅច្រាសទិសគ្នាពីលិចទៅកើត លុះមកដល់ត្រង់ចំណុចកើតហេតុអ្នកបើកម៉ូតូហុងដាឌ្រីម បើកបរទាំងមានជាតិស្រវឹង ហើយជិះលឿនបានជិះជែងរថយន្តមួយគ្រឿងដែលនៅខាងមុខ ខណៈបើកជែងរថយន្តមិនផុត ក៏ជ្រុលទៅបុកនឹងរ៉ឺម៉កម៉ូតូចំហៀងខាងឆ្វេងបណ្ដាលឱ្យអ្នកបើករ៉ឺម៉កម៉ូតូរបួសរយះជើងខាងឆ្វេង ចំណែកអ្នកបើកម៉ូតូបង្កបានដួលបោកក្បាលទៅនឹងថ្នល់ប៉ោងក្បាលខាងក្រោយធ្វើឲ្យរវើរវាយជ្រុះថង់ដាក់លុយពណ៌ខ្មៅពីលើម៉ូតូចំនួន១០ម៉ឺនដុល្លារដោយមិនដឹងខ្លួន ។
ក្រោយពេលកើតហេតុអ្នកបើកម៉ូតូបង្កដែលរងរបួសត្រូវបានរថយន្តសង្គ្រោះដឹកយកទៅព្យាបាលនៅគ្លីនិកឯកជន ចំណែកថង់លុយដែលជ្រុះនោះត្រូវបានពីរនាក់ប្តីប្រពន្ធដែលមានផ្ទះនៅក្បែរកន្លែងកើតហេតុ ហើយបុរសជាប្តីបានស្លៀកក្រមាចេញមកឈរមើលហេតុការណ៍ ក៏រើសបានថង់ពណ៌ខ្មៅ ស្រាយថង់មើលឃើញសុទ្ធតែក្រដាសប្រាក់១០០ដុល្លារចងចំនួន១០ដុំ ក៏មិនបាននិយាយស្តីអ្វីទាំងអស់បានកាន់ថង់លុយនោះជាប់ដោយមិនព្រមប្រគល់ឲ្យសមត្ថកិច្ចទេ រង់ចាំលោកស្នងការរងខណ្ឌទួលគោកមក និងសាច់ញាតិរបស់ជនរងគ្រោះមកធ្វើឯកសារច្បាស់លាស់ទើបប្រគល់ឲ្យទៅជនរងគ្រោះវិញ ។
ក្រោយពេលកើតហេតុស្ត្រីជាជនជាតិថៃ ដែលជាប្រពន្ធរបស់បុរសម្ចាស់លុយបានមកដល់កន្លែងកើតហេតុបានអះអាងប្រាប់សមត្ថកិច្ចថា ប្តីរបស់គាត់ទើបតែមកពីបើកលុយនៅធនាគារយកទៅបង្វិលរកស៊ីព្រោះពួកគាត់ជាអ្នករកស៊ីលក់ចាបហួយ និងលក់ខោអាវបោះដុំ ។ ខណៈដែលប្រពន្ធមកដល់កន្លែងកើតហេតុហើយអ្នកដែលរើសបានលុយមិនទាន់ប្រគល់ឲ្យភ្លាមៗទេ ទាល់តែប្រពន្ធបានទៅដឹកបុរសជាប្តីដែលរងរបួសចេញមកពីមន្ទីរពេទ្យអះអាងថា ជាប្រពន្ធរបស់គាត់ពិតប្រាកដមែនទើបអ្នកដែលរើសបានលុយនោះព្រមប្រគល់ឲ្យទៅស្ត្រីជាប្រពន្ធយកទៅរក្សាទុកតែម្តង ៕ ថាច់ យ៉ាត
