សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ រថយន្តមិនស្គាល់ម៉ាកបើកយ៉ាងលឿនបោះពួយបុកកង់កំពុងជិះកង់ឆ្លងផ្លូវ បណ្តាលឲ្យបុរសម្នាក់ស្លាប់បាត់បង់ជីវិត កាលពីវេលាម៉ោង១៨ និង៥៥នាទី ថ្ងៃទី២៨ ខែមេសា ឆ្នាំ២០១៧ នៅលើកំណាត់ផ្លូវជាតិលេខ៦ ត្រង់ចំណុចចន្លោះគីឡូម៉ែត្រលេខ៣០-៣១ ស្ថិតក្នុងភូមិព្រែកយាយហ៊ិន២ ឃុំឫស្សីជ្រោយ ស្រុកមុខកំពូល ខេត្តកណ្តាល ។
មន្ត្រីនគរបាលចរាចរណ៍ស្រុកមុខកំពូលបានឲ្យដឹងថា ជនរងគ្រោះស្លាប់បាត់បង់ជីវិតនោះឈ្មោះ ម៉ង់ ចំរើន ភេទប្រុស អាយុ៥៨ឆ្នាំ មានទីលំនៅភូមិព្រែកយាយហ៊ិន២ ឃុំឫស្សីជ្រោយ ស្រុកមុខកំពូល ។ ចំណែកឯរថយន្តមិនស្គាល់ម៉ាក ក្រោយពីបុកកង់ឆ្លងផ្លូវបណ្តាលឲ្យមានមនុស្សស្លាប់បានបើកគេចទៅទិសខាងជើងបាត់ស្រមោល ។
ប្រភពដដែលបានបន្តថា នៅមុនពេលកើតហេតុសាក្សីបានឃើញជនរងគ្រោះរូបនេះជិះកង់មួយគ្រឿងឆ្លងផ្លូវជាតិលេខ៦ពីលិចទៅកើត ខណៈនោះក៏ស្រាប់តែមានរថយន្តមិនស្គាល់ម៉ាកបើកមកពីទិសខាងត្បូងឆ្ពោះទៅទិសខាងជើង បុកត្រូវចំកង់ជនរងគ្រោះពេញមួយទំហឹង បណ្តាលឲ្យជនរងគ្រោះដួលបោកទៅលើផ្លូវរងរបួសយ៉ាងធ្ងន់ធ្ងររហូតស្លាប់បាត់បង់ជិវិតយ៉ាងអណោចអធ័ម ។
ក្រោយពីមានហេតុការណ៍កើយឡើង រថយន្តបានបើកគេចទៅទិសខាងជើងបាត់ស្រមោល ។ ដោយឡែកសាកសពជនរងគ្រោះត្រូវបានសមត្ថកិច្ចនគរបាលចរាចរណ៍ស្រុកមុខកំពូលប្រគល់ទៅឲ្យក្រុមគ្រួសារចាត់ចែងធ្វើបុណ្យតាមប្រពៃណី ៕ ស្អាងជ័យ
