សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ បុរសម្នាក់ចូលទៅទិញភេសជ្ជៈដោយមិនបានដកកូនសោរចេញពីម៉ូតូ ត្រូវចោរលួចជិះទៅបាត់ តែសំណាងល្អត្រូវបាននគរបាលក្របួចបានមកវិញ ។ ករណីលួចម៉ូតូនេះបានកើតឡើង កាលពីវេលាម៉ោង១៨ និង៣០នាទី ថ្ងៃទី៣០ ខែមេសា ឆ្នាំ២០១៧ ត្រង់ចំណុចខាងមុខផ្ទះលក់ភេសជ្ជ:ប្តីប្រពន្ធឈ្មោះ វុធ រី ស្ថិតក្នុងភូមិព្រែកល្វា ឃុំព្រែកតាកូវ ស្រុកខ្សាច់កណ្តាល ខេត្តកណ្តាល ។
មន្ត្រីនគរបាលស្រុកខ្សាច់កណ្តាលបានឲ្យដឹងថា ជនសង្ស័យឈ្មោះ ណៅ ខ្លូត ភេទប្រុស អាយុ២២ឆ្នាំ ជនជាតិខ្មែរ មុខរបរ កម្មករសំណង់ មានស្រុកកំណើតខេត្តកំពត បច្ចុប្បន្នដើរស្នាក់នៅមិនពិតប្រាកដ ។ ចំណែកឯជនរងគ្រោះឈ្មោះ ច្រឹក ប៊ុនរី ភេទប្រុស អាយុ៤៤ឆ្នាំ ជនជាតិខ្មែរ មុខរបរ កសិក មានទីលំនៅភូមិព្រែកល្វា ឃុំព្រែកតាកូវ ស្រុកខ្សាច់កណ្តាល ជាម្ចាស់ម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៤ ពាក់ស្លាកលេខភ្នំពេញ 1AB-9683 ។
ប្រភពដដែលបានបន្តថា នៅមុនពេលកើតហេតុជនរងគ្រោះបានជិះម៉ូតូរបស់ខ្លួនទៅទិញភេសជ្ជៈនៅផ្ទះរបស់ប្តីប្រពន្ធឈ្មោះ វុធ រី ។ ពេលទៅដល់ជនរងគ្រោះបានឈប់ម៉ូតូនៅខាងមុខផ្ទះ ដោយពុំបានដកកូនសោរចេញពីម៉ូតូនោះទេ ហើយក៏បានដើរចូលទៅក្នុងផ្ទះលក់ភេសជ្ជៈបាត់ទៅ ខណៈនោះជនសង្ស័យបានចូលទៅកាច់សោរម៉ូតូជនរងគ្រោះបញ្ឆេះជិះគេចខ្លួនឆ្ពោះទៅឃុំព្រែកតាមាក់ ។ លុះជិះបានប៉ុន្មានគីឡូម៉ែត្រម៉ូតូក៏អស់សាំង សមត្ថកិច្ចបានតាមទាន់ចាប់ខ្លួនបញ្ជូនទៅកាន់អធិការដ្ឋាននគរបាលស្រុកខ្សាច់កណ្តាល ដើម្បីចាត់ការតាមនីតិវិធីច្បាប់ ៕ស្អាងជ័យ
