សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: កម្លាំងសមត្ថកិច្ចនគរបាលខណ្ឌឫស្សីកែវ បានឃាត់ខ្លួនជនសង្ស័យម្នាក់ និងបាន ដកហូតថ្នាំញៀន ៥កញ្ចប់ ដាវកែច្នៃ២ដើម កាលពីវេលាម៉ោង ៦និង៣០នាទីយប់ ថ្ងៃទី៥ ខែឧសភា ឆ្នាំ២០១៧ ស្ថិតនៅចំណុចផ្ទះបែបណ្តែតទឹក ក្រុម៥ ភូមិលូ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
មន្រ្តីនគរបាលខណ្ឌឫស្សីកែវបានឲ្យដឹងថា ជនសង្ស័យមានឈ្មោះ ជិន រ៉ូ ភេទប្រុស អាយុ២៩ឆ្នាំ មុខរបរលក់ដូរ មានទីលំនៅក្រុម២ ភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ។
សមត្ថកិច្ចបានបន្តទៀតថា មុនពេលកើតហេតុសមត្ថកិច្ចយើងបានសហការជាមួយនគរបាលប៉ុស្តិ៍ស្វាយប៉ាក បានស្រាវជ្រាវរកជនសង្ស័យជួញដូរថ្នាំញៀនរហូតឈានដល់ការបើកប្រតិបត្តិការចុះបង្ក្រាបទីតាំងផ្ទះបែត្រី បណ្តែតទឹកខាងលើ ហើយបានឃាត់ខ្លួនជនសង្ស័យម្នាក់ ព្រមទាំងដកហូតម្សៅក្រាមពណ៌សថ្លា ចំនួន ៥កញ្ចប់ ដាវសាមូរ៉ៃកែច្នៃចំនួន ២ដើម និងឧបករណ៍ប្រើប្រាស់មួយចំនួន។
បច្ចុប្បន្នជនសង្ស័យរូបនេះ រួមនឹងវត្ថុតាង ត្រូវសមត្ថកិច្ចបញ្ជូនខ្លួនទៅឃុំខ្លួនជាបណ្តោអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីចាត់ការតាមនីតិវិធី ៕ ប្រាថ្នា
