សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ យុវជនម្នាក់បើកម៉ូតូម៉ាកTodayបោះពួយជ្រុលទៅបុកជាមួយម៉ូតូកង់បី បើកច្រាស់ទិសគ្នា ពេញមួយទំហឹង បណ្តាលឲ្យដួលបោកទៅលើផ្លូវស្លាប់ភ្លាមៗមួយរំពេច រីឯអ្នកបើកបរម៉ូតូកង់បីរត់គេចខ្លួណបាត់ស្រមោល ។ ករណីគ្រោះថ្នាក់ចរាចរណ៍នេះបានកើតឡើង កាលពីវេលាម៉ោង៨ និង២០នាទី ថ្ងៃទី០៧ ខែឧសភា ឆ្នាំ២០១៧ នៅលើកំណាត់ផ្លូវជាតិលេខ២ ត្រង់ចំណុចចន្លោះគីឡូម៉ែត្រលេខ២៩-៣០ ស្ថិតក្នុងភូមិប្រឡាយ ឃុំបឹងខ្យាង ស្រុកកណ្ដាលស្ទឹងខេត្តកណ្ដាល ។
មន្ត្រីនគរបាលចរាចរណ៍ស្រុកកណ្តាលស្ទឹងបានឲ្យដឹងថា ជនរងគ្រោះឈ្មោះ ឡុង តុលា ភេទប្រុស អាយុ២២ឆ្នាំ ជនជាតិខ្មែរ មុខរបរ ជាងជួសជុលទូរទស្សន៍ មានទីលំនៅភូមិក្រាំងពោធិ៍ ឃុំពុតស ស្រុកបាទី ខេត្តតាកែវ ជិះម៉ូតូម៉ាកToday ពណ៌ទឹកប៊ិច ពាក់ស្លាកលេខភ្នំពេញ1GH-5630 ។ ចំណែកឯម៉ូតូកង់បីបើកបរដោយជនមិនស្គាល់អត្តសញ្ញណ ក្រោយពីកើតហេតុបានរត់គេចខ្លួនបាត់ស្រមោល ។
ប្រភពដដែលបានបន្តថា នៅមុនពេលកើតហេតុសាក្សីបានឃើញជនរងគ្រោះរូបនេះជិះម៉ូតូម្នាក់តាមបណ្តោយផ្លូវជាតិលេខ២ ក្នុងទិសដៅពីភ្នំពេញឆ្ពោះទៅខេត្តតាកែវ ។ លុះបើកដល់ចំណុចកើតហេតុជនរងគ្រោះ បានបន្ថែមល្បឿនឡើងវ៉ារថយន្តកំពុងបើកនៅខាងមុខ ក្នុងស្ថានៅភាពគ្រោះថ្នាក់ ទើបបណ្តាលឲ្យជ្រុលទៅបុកជាមួយម៉ូតូកង់បីបើកច្រាស់ទិសគ្នាពេញមួយទំហឹងដួលបោកទៅលើផ្លូវស្លាប់ភ្លាមៗមួយរំពេច ។
ក្រោយពីមានហេតុការណ៍កើតឡើងអ្នកបើកបរម៉ូតូកង់បីបានចុះរត់គេចខ្លួន រីមធ្យោបាយពាក់ព័ន្ធ ត្រូវបានសមត្ថកិច្ចនគរបាលជំនាញចរាចរណ៍ធ្វើការវាស់វែងដកហូតបញ្ជូនទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមច្បាប់ ។ បច្ចុប្បន្នសាកសពជនរងគ្រោះត្រូវបានសមត្ថកិច្ចនគរបាលប្រគល់ទៅឲ្យក្រុមគ្រួសារចាត់ចែងធ្វើបុណ្យតាមប្រពៃណី ៕ ស្អាងជ័យ
