សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានការភ្ញាក់ផ្អើលចោមរោមមើល ដល់អ្នកហាត់ប្រាណ និងអ្នកធ្វើដំណើរឆ្លងកាត់ ដោយមានបុរសម្នាក់ ខណៈកំពុងអង្គុយលើម៉ូតូជជែករឿងទិញសីមទូរសព្ទ័ ស្រាប់តែមានរថយន្តឆ្លាមមួយគ្រឿង បើកបរពីជើងមកត្បូង បុកនឹងម៉ូតបណ្ដាលឲ្យខ្ទាតប្រមាណ៥ម៉ែត្រ តែមនុស្សលោតចេញទាន់ទាំងប្រលឹងចុងសក់ ។
ហេតុការណ៍កើតឡើងម៉ោង៦និង១០នាទីព្រលប់ ថ្ងៃទី១៧ ខែឧសភា ឆ្នាំ២០១៧ ស្ថិតនៅសួនច្បាររូបគោ ភូមិសាលាស្រុកចាស់ សង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង ។
សាក្សីថា បុរសម្នាក់ អាយុប្រមាណ២០ឆ្នាំ ឈប់ម៉ូតូម៉ាកស្កូពី ពណ៌ក្រហម ស្លាកលេខ ភ្នំពេញ ១AR៤៣២៥ អង្គុយលេងនៅសួនច្បាររូបគោ ជជែកគ្នាជាមួយនារីដើរលក់សីមទូរស័ព្ទប្រមាណ១០នាទី រថយន្តឆ្លាមមួយគ្រឿង ពណ៌ត្រីឆ្លូញ ស្លាកលេខ ភ្នំពេញ ២N៣៨៥០ បើកបរដោយបុរសម្នាក់ មិនស្គាល់ឈ្មោះ ពីជើងមកត្បូងល្បឿនធម្មតា មិនដឹងយ៉ាងម៉េច បុកម៉ូតូពេញទំហឹងខ្ទាត៥ម៉ែត្រ រីឯមនុស្សលោតចេញទាន់ទាំងប្រលឹងចុងសក់។
អ្នកបើករថយន្តចុះសម្រួលជាមួយម្ចាស់ម៉ូតូខូចខាតយ៉ាងដំណំ ហើយរថយន្តបែកស្តុបខាងស្ដាំ ប្រមាណជាង១០នាទី មិនចង់រំខានសមត្ថកិច្ច ម្ចាស់រថយន្តចេញសងខូចខាតឲ្យភាគីម៉ូតូ ៕ យឹម សុថាន
