សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ លោក ផូង វណ្ណ ចៅក្រមស៊ើបសួរសាលាដំបូងខេត្តកណ្ដាល នៅថ្ងៃទី៣១ ខែឧសភា សម្រេចឃុំខ្លួនបុរសម្នាក់ដាក់ពន្ធនាគារបណ្តោះអាសន្ន ដើម្បីស៊ើបសួរករណីបើករថយន្តបុកម៉ូតូបណ្តាលឲ្យបុរសចំណាស់ម្នាក់ស្លាប់នៅស្រុកកណ្ដាលស្ទឹង ។
មន្ត្រីតុលាការថ្លែងថា បុរសរូបនេះឈ្មោះ ចាប សុខលីម អាយុ៤០ឆ្នាំ ត្រូវបានលោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្តកណ្ដាល ចោទប្រកាន់ពីបទ “ បើកបរធ្វេសប្រហែសបណ្តាលឲ្យស្លាប់អ្នកដទៃ “ តាមមាត្រា៨៥ច្បាប់ស្តីពីចរាចរណ៍ផ្លូវគោក ។
ហេតុការណ៍គ្រោះថ្នាក់ចរាចរនេះ កើតឡើងកាលពីព្រឹកថ្ងៃទី៣០ ខែឧសភា នៅចំណុចផ្លូវលំ ភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ។
នគរបាល បញ្ជាក់ថា រថយន្តម៉ាកហ៊ីយ៉ាន់ដាយ ពណ៌ស លាយលឿងគ្មានស្លាកលេខ បើកបរដោយឈ្មោះចាប សុខលីម ពីលិចទៅកើតបុកម៉ូតូរងគ្រោះម៉ាកគុបមូល៥០ គ្មាន ស្លាកលេខ បើកបរឈ្មោះសំរោង ទុយ ភេទប្រុស អាយុ ៧៩ឆ្នាំ បណ្តាលឲ្យស្លាប់ជនរងគ្រោះពេលនាំទៅមន្ទីរពេទ្យ ៕ចេស្តា
