សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ ស្ត្រីម្នាក់បានទទួលរងរបួសយ៉ាងធ្ងន់ បន្ទាប់ពីស្ត្រីរូបនេះបើកម៉ូតូឆ្លងផ្លូវដោយខ្វះការប្រុងប្រយ័ត្នជ្រុលទៅបុកមួយរថយន្តកុងតឺន័ររបស់កំពង់ផែស្វ័យភ្នំពេញ កាលពីវេលាម៉ោង០៩ និង២៥នាទី ថ្ងៃតី១៣ ខែមិថុនា ឆ្នាំ២០១៧ នៅលើកំណាត់ផ្លូវជាតិលេខ២១បេ ស្ថិតក្នុងភូមិទួលក្រសាំង ឃុំរកាខ្ពស់ ស្រុកស្អាង ខេត្តកណ្តាល ។
មន្ត្រីនគរបាលចរាចរណ៍ស្រុកស្អាងបានឲ្យដឹងថា ស្ត្រីរងគ្រោះឈ្មោះវង់ រតនា ភេទស្រី អាយុ២៤ឆ្នាំ ជនជាតិខ្មែរ មុខរបរ កម្មករ មានទីលំនៅភូមិព្រែករុន ឃុំព្រែកគយ ស្រុកស្អាងជិះម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៧ គ្មានស្លាកលេខ ។ ចំណែកឯរថយន្តកុងតឺន័រ ពណ៌ខៀវ ពាក់ស្លាកលេខភ្នំពេញ3D-2061 ជារថយន្តរបស់កំពង់ផែស្វ័យភ្នំពេញ បើកបរដោយជនមិនស្គាល់អត្តសញ្ញាណ ។
ប្រភពដដែលបានបន្តថា នៅមុនពេលកើតហេតុសាក្សីបានឃើញស្ត្រីរងគ្រោះជិះម៉ូតូតាមបណ្តោយផ្លូវជាតិលេខ២១បេ ក្នុងទិសដៅពីត្បូងទៅជើងហើយបានបត់ឆ្វេងឆ្លងផ្លូវដោយខ្វះការប្រុងប្រយ័ត្ន បណ្តាលឲ្យជ្រុលទៅបុករថយន្តកុងតឺន័រ ដែលកំពុងបើកបរក្នុងទិសដៅពីជើងទៅត្បូងពេញមួយទំហឹង បណ្តាលឲ្យរងរបួសយ៉ាងធ្ងន់ធ្ងរ ។ ក្រោយពីមានហេតុការណ៍កើតឡើងអ្នកបើកបររថយន្តានចុះគេចខ្លួនបាត់ រីឯស្ត្រីរងគ្រោះត្រូវបានបញ្ជូនតាមរថយន្តសាមុយទៅសង្រ្គោះនៅមន្ទីរពេទ្យជ័យជំនះក្រុងតាខ្មៅ ។ ដោយឡែកមធ្យោបាយពាក់ព័ន្ធទាំង២គ្រឿងត្រូវបានបញ្ជូនទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមច្បាប់ ៕ ស្អាងជ័យ
