សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យ៉ាងហោចណាស់ មានមនុស្សប្រុស ស្រី ៧នាក់ ក្នុងនោះមាន ក្មេងតូចម្នាក់ផងនោះ បានទទួលរងរបួសធ្ងន់ និងស្រាល ដោយករណី រ៉ឺម៉កម៉ូតូដឹកធុងហ្គាស បើកបុកកន្លែងជួសជុលម៉ូតូ បង្កជាអណ្តាតភ្លើងឆាបឆេះយ៉ាងសន្ធោសន្ធៅ នៅចំណុចផ្លូវបេតុង ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ កាលពីវេលាម៉ោង ប្រមាណ ៩ និង៤៥នាទីព្រឹក ថ្ងៃទី១៦ ខែមិថុនា ឆ្នាំ២០១៧ ។
អ្នកឃើញហេតុការណ៍ប្រាប់អោយដឹងថា មុនពេលកើតហេតុ ពួកគាត់ឃើញ ភាគីខាងរ៉ឺម៉កម៉ូតូដឹកធុងហ្គាស មានមនុស្ស ២នាក់ បើកបរតាមបណ្តោយផ្លូវបេតុង ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ ក្មុងទិសដៅពីកើតទៅលិច ខណះមកដល់ចំណុចកើតហេតុ មិនដឹងជា មានមូលហេតុអ្វីនោះទេ ស្រាប់ជ្រុលចង្កូតទៅខាងស្តាំដៃ ស្ទុះទៅបុកកន្លែងលក់ដបសាំង ដែលដាក់តាំងនៅចំណុចកន្លែងជួសជុលម៉ូតូនោះ បង្កជាអណ្តាតភ្លើងឆាបឆេះយ៉ាងសន្ធោសន្ធៅ បណ្តាលអោយមនុស្សប្រុស ស្រី ចំនួន ៧នាក់ ក្នុងនោះមាន ក្មេងតូចម្នាក់ផងនោះ បានទទួលរងរបួសធ្ងន់ និងស្រាល បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ច ហៅ រថយន្តពន្លត់អគ្គិភ័យជួយអន្តរាគមន៍ រយះពេលជាច្រើននាទី ទើបអណ្តាតភ្លើងរលត់ទៅវិញទាំងស្រុង ។
ប្រភពព័ត៌មានដដែលប្រាប់បន្តអោយដឹងថា ជនរងគ្រោះប្រុស ស្រី ទាំង ៧នាក់ នោះ ត្រូវបានដឹកបញ្ជូនភ្លាមៗ តាមរយះរថយន្តសាមុយ ដើម្បីយកទៅសង្គ្រោះបន្ទាន់នៅមន្ទីរពេទ្យ ។
ទី១ មានឈ្មោះ គឹម ស្រ៊ូយ ភេទស្រី អាយុ៤៨ឆ្នាំ ស្នាក់នៅកន្លែងកើតហេតុ រងរបួសធ្ងន់ ទី២ឈ្មោះ សួន សំណាង ភេទប្រុស អាយុ១៩ឆ្នាំ ទី៣ ឈ្មោះ លី ណាល់ ភេទប្រុស អាយុ១៧ឆ្នាំ ទាំងពីរនាក់នេះ ជាអ្នកបើកម៉ូតូដឹកធុងហ្គាសរងរបួសធ្ងន់ ទី៤ឈ្មោះ គឹម ស្រៀង ភេទប្រុស អាយុ៤៤ឆ្នាំ ទី៥ ឈ្មោះ សៀម សុខ ភេទស្រី អាយុ១៤ឆ្នាំ ទី៦សៀម សាន្ត ភេទប្រុស អាយុ៤ឆ្នាំ និងទី៧ឈ្មោះ សៀម សា ភេទប្រុស អាយុ៤ឆ្នាំទាំង៤នាក់ រងរបួសស្រាល។
សមត្ថកិច្ចប្រាប់ឲ្យដឹងថា សមត្ថកិច្ចប្រើប្រាស់រថយន្តពន្លត់អគ្គីភ័យ ចំនួន ៦គ្រឿង បាញ់ទឹកអស់រថយន្ត ចំនួន ៣គ្រឿង ទើបអណ្តាតភ្លើងរលត់ទៅវិញទាំងស្រុងប៉ុន្មាននាទីក្រោយមក ។ សម្ភារ ខូចខាត ម៉ូតូ ៥គ្រឿង ក្នុងនោះ រួមមាន រ៉ឺម៉កម៉ូតូដឹកធុងហ្គាស ចំនួន ១គ្រឿង ម៉ាស៊ីន បូមខ្យល់ ចំនួន ១គ្រឿង ម៉ាស៊ីនភ្លើង ចំនួន ១គ្រឿង ដបសាំង និងសម្ភារមួយចំនួនទៀត ៕ តុង សីហា
