ចេញពីច្រៀងនៅពិភពរាត្រីត្រូវចោរឆក់កាបូបលុយ៤០០ដុល្លារ និង ទូរស័ព្ទ iPhone 7 Plus

ភ្នំពេញ៖ តារាចំរៀងស្រី អោក សុម៉ាលីតា ទើបតែចេញមកពីច្រៀងនៅពិភពរាត្រីត្រូវ ក្រុមចោរឆក់ធ្វើសកម្មភាពឆក់កាបូបអស់លុយ៤០០ដុល្លា និង ទូរស័ព្ទ iPhone 7 Plus មួយគ្រឿង ហើយក្រុមចោរជិះម៉ូតូគេចដោយសុវត្ថិភាព។ ហេតុការណ៍នេះនៅវេលាម៉ោង៤ទៀបភ្លឺ ថ្ងៃទី ២១ ខែ មិថុនា ឆ្នាំ២០១៧ ត្រង់ចំណុចជិតស្និទ្ធទូតចិន ស្ថិតនៅតាមបណ្តោយផ្លូវម៉ៅសេទុង សង្កាត់ទំនប់ទឹក ខណ្ឌចំការមន រាជធានីភ្នំពេញ។

ស្ដ្រីរងគ្រោះខាងលើមាន ឈ្មោះ អោក សុម៉ាលីតា អាយុ ៣៦ ឆ្នាំ មានមុខរបរជាតារាចំរៀង ស្នាក់នៅសង្កាត់វាលស្បូវ ខណ្ឌច្បារអំពៅ ។

បើតាមសំដីតបស់ តារាចំរៀង អោក សុម៉ាលីតា បានរៀបរាប់ប្រាប់ឲ្យដឹងថា មុនពេលកើតហេតុរូបខ្ញុំទើបតែចេញពីធ្វើការ នៅពិភពរាត្រី ហើយបានជិះម៉ូតូមួយគ្រឿងម៉ាក វីវ៉ា ព៌ណខ្មៅ ជាមួយបងប្រុសរបស់ខ្ញុំ ធ្វើដំណើរតាមបណ្ដោយផ្លូវ ម៉ៅសេទុង ក្នុងទិសដៅពីត្បូងទៅជើង ក្នុងគោលបំណងជិះត្រលប់ទៅផ្ទះ នៅសង្កាត់វាលស្បូវ ខណ្ឌច្បារអំពៅ ខណៈមកដល់ចំណុចកើតហេតុខាងលើ ស្រាប់តែមានជនសង្ស័យ២នាក់ជិះម៉ូតូ មួយគ្រឿង ម៉ាកហុងដាសេ១២៥ ពណ៌ខ្មៅ មិនចាំស្លាកលេខរួមនឹងបក្ខពួកវាម្នាក់ទៀតជិះម៉ូតូធំមួយគ្រឿង មិនស្គាល់ម៉ាកជាអ្នកបិទគូទពីក្រោយ មួយស្ទុះក្រោយមកជនសង្ស័យ២នាក់ជិះម៉ូតូ មួយគ្រឿង ម៉ាកហុងដាសេ១២៥ បានធ្វើសកម្មភាពឆក់កាបូបរបស់ខ្ញុំបានសម្រេច ខណៈពេលនោះរូបខ្ញុំ និងបងប្រុសបានព្យាយាមបើកម៉ូតូដេញតាមពីក្រោយ តែដេញមិនទាន់ ក៏ក្រុមចោរឆក់ទាំងនោះបានជិះម៉ូតូរត់គេចខ្លួនបាត់ដោយសុវត្ថិភាព។

ដោយនៅក្នុងកាបូបលុយដែលត្រូវចោរឆក់យកទៅនោះមានលុយ៤០០ ដុល្លា និងទូរស័ព្ទ iPhone 7 Plusមួយគ្រឿង រួនមាន អត្តសញ្ញណប័ណ្ណរបស់គាត់ និងប័ណ្ណពិនិត្យសុខភាពរបស់ម្ដាយរបស់គាត់ និងឯកសាររបស់គាត់មួយចំនួនទៀតនៅក្នុងកាបូប ។

ក្រោយកើតហេតុតារាចំរៀង អោក សុម៉ាលីតា បានទៅដាក់ពាក្យបណ្ដឹងនៅប៉ុស្ពិ៍នគរបាលទំនប់ទឹក ដើម្បីអោយសមត្ថកិច្ចតាមស្រាវជ្រាវរកក្រុមចោរឆក់ទាំងនោះផង ៕ ស រស្មី