សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្ដNAVARA មួយគ្រឿងបើកក្នុងល្បឿនលឿនសង្ស័យម្ចាស់ងងុយដេក បើកបុកឡើងឃឿនសួនច្បារ និងដើមផ្កាចំប៉ីបាក់អស់មួយដើម ហើយរថយន្ដកល់ជាប់គល់ឈើទៅមុខលែងរួច និងបណ្ដាលឲ្យអ្នកជិះក្នុងរថយន្ដរងរបួសម្នាក់។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង០៣និង០០នាទីទៀបភ្លឺ ថ្ងៃទី៣០ ខែមិថុនា ឆ្នាំ២០១៧ នៅចំណុចជិតក្ដាន់២ តាមបណ្ដោយមហាវិថីសហព័ន្ធរុស្សី ក្នុងសង្កាត់មិត្តភាព ខណ្ឌ៧មករា រាជធានីភ្នំពេញ។
រថយន្ដបង្កម៉ាក NAVARA ពណ៌ប្រផេះ ពាក់ស្លាកលេខ ភ្នំពេញ2AH-2782 ។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញរថយន្ដបង្កជិះជាលក្ខណៈគ្រួសារ ធ្វើដំណើរតាមបណ្ដោយមហាវិថីសហព័ន្ធរុស្សី ទិសដៅពីលិចទៅកើតក្នុងល្បឿនលឿន ពេលមកដល់ចំណុចកើតហេតុ ទំនងជាអ្នកបើករថយន្ដងងុយដេកបានរេចង្កូតទៅបុកឡើងឃឿនសួនច្បារចិញ្ចើមផ្លូវ និងបន្តទៅបុកដើមផ្កាចំប៉ីបណ្ដាលឲ្យបាក់អស់មួយដើមកល់រថយន្ដជាប់ទៅមុខលែងរួច និងបណ្ដាលឲ្យស្ត្រីម្នាក់ដែលជិះក្នុងរថយន្ដរងរបួសផងដែរ។
ប្រភពបានបន្តថា ក្រោយពីកើតហេតុ អ្នកជិះនៅក្នុងរថយន្ដបាននាំគ្នាចុះពីរថយន្ដហើយបានដឹកស្ត្រី ដែលរងរបួសទៅសង្គ្រោះនៅឯមន្ទីរពេទ្យ។ បន្ទាប់មកកម្លាំងសមត្ថកិច្ចមូលដ្ឋានបានចុះដល់កន្លែងកើតហេតុ និងបានទំនាក់ទំនងទៅកម្លាំងជំនាញចរាចរណ៍ចុះវាស់វែងស្ទួចយករថយន្ដបង្កទៅរក្សាទុកនៅការិយាល័យចរាចរណ៍រាជធានីភ្នំពេញ ដើម្បីរង់ចាំដោះស្រាយតាមផ្លូវច្បាប់នៅពេលក្រោយ៕ ស រស្មី
