សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ និងថ្នាំញៀនចំនួន ១៧កញ្ចប់តូចធំ ត្រូវបានកម្លាំងនគរបាលខណ្ឌឫស្សីកែវ ធ្វើការបង្ក្រាបជាក់ជាក់ស្តែង កាលពីវេលាម៉ោង ៧និង១៥នាទីយប់ ថ្ងៃទី០៣ ខែកក្កដា ឆ្នាំ២០១៧ នៅចំណុចផ្លូវលំ ក្រុម១០ ភូមិលូ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
ជនសង្ស័យដែលឃាត់ខ្លួននោះមានឈ្មោះ ស៊ុម ហ៊ឹង ភេទប្រុស អាយុ ៣០ឆ្នាំ ជនជាតិខ្មែរ មុខរបរ មិនពិតប្រាដក (ជួញដូរគ្រឿងញៀន) ស្នាក់នៅផ្លូវលំ ក្រុម១០ ភូមិលូ សង្កាត់ស្វាយប៉ាក។
សមត្ថកិច្ចបានឲ្យដឹងថា ប្រតិបត្តិការខាងលើនេះ គឺកម្លាំងសមត្ថកិច្ចយើងបានសហការជាមួយកម្លាំងសមត្ថកិច្ចប៉ុស្តិ៍ស្វាយប៉ាក បានធ្វើការចុះបង្ក្រាបជាក់ស្តែងនៅមុខសញ្ញាចែកចាយគ្រឿងញៀនម្នាក់ និងបានដកហូតម្សៅក្រាមពណ៌សថ្លា ចំនួន ១៧កញ្ចប់ ដោយក្នុងនោះមាន មួយកញ្ចប់ធំ, ជញ្ជីងថ្លឹងគ្រឿងញៀនចំនួនមួយ, ថង់សម្រាប់ច្រកគ្រឿងញៀនមួយចំនួន, ឧបករណ៍ប្រើប្រាស់គ្រឿងញឿនមួយចំនួន និងដាវកែច្នៃចំនួន មួយដើម។ ក្រោយមក សមត្ថកិច្ចយើងបាននាំខ្លួនជនសង្ស័យខាងលើមកកាន់ប៉ុស្តិ៍នគរបាលរដ្ឋបាលស្វាយប៉ាក ដើម្បីធ្វើការសកសួរ។
បច្ចុប្បន្នជនសង្ស័យខាងលើ រួមនឹងវត្ថុតាង ត្រូវសមត្ថកិច្ចបញ្ជូនទៅឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងចាត់ការបន្តតាមផ្លូវច្បាប់៕ ប្រាថ្នា
