សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ គូសង្សារខ្មែរ ចិនមួយគូបានបើករថយន្តជ្រុលបុករបាំងថ្មពុះចែកទ្រូងផ្លូវបណ្តាលឲ្យគៀបជាប់ទៅមុខលែងរួច សង្ស័យខណៈកំពុងបើកបរមិនបានមើលមុខ ព្រោះគិតតែសាសងគ្នា។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១០និង៣០នាទីយប់ ថ្ងៃទី៤ ខែកក្តដា ឆ្នាំ២០១៧ នៅត្រង់ចំណុចខាងលិចស្តុបពេទ្យចិន តាមបណ្ដោយផ្លូវព្រះសីហនុ ស្ថិតក្នុងសង្កាត់ បឹងព្រលិត ខណ្ឌ៧មករា រាជធានីភ្នំពេញ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តម៉ាក RAV4 ពណ៌ទឹកប្រាក់ ពាក់ស្លាកលេខ ភ្នំពេញ 2AG 4620 បើកបរដោយបុរសជនជាតិចិនម្នាក់ និងនារីជាជនជាតិខ្មែរម្នាក់ទៀត រួមដំណើរជាមួយធ្វើដំណើរតាមបណ្តោយផ្លូវព្រះសីហនុ ក្នុងទិសដៅពីកើតទៅលិច ខណៈមកដល់ចំណុចស្តុប រថយន្តបានបើកឆ្លងស្តុប ស្រាប់តែរថយន្តរេចង្កូតមកឆ្វេងដៃបុកក្បាលនាគពុះចែកទ្រូងផ្លូវពេញទំហឹង
បណ្តាមឲ្យរថយន្តគៀបជាប់ផ្នែកខាងមុខ ផ្ទុះពោងទៅមុខលែងរួច តែមិនខូចខាតដល់ក្បាលនាគចែកទ្រូងផ្លូវនោះទេ។
ក្រោយកើតហេតុសមត្ថកិច្ចមូលដ្ឋានបានចុះមកដល់កន្លែងកើតហេតុ រួចទំនាក់ទំនងទៅជំនាញចរាចរណ៍រាជធានីឲ្យមកចុះវាស់វែង យករថយន្តបង្កខាងលើ ទៅរក្សាទុកនៅការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញរង់ចាំការដោះស្រាយគ្នាតាមផ្លូវច្បាប់នៅពេលក្រោយ៕ សុខាសែនជ័យ
