សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្តរមានជ័យៈ បុរសវយ័ចំណាស់ម្នាក់ ត្រូវបានរថយន្ដបុកស្លាប់នៅនឹងកន្លែងកើតហេតុ បន្ទាប់ពីរូបគាត់បានជិះម៉ួតូបម្រុងទៅដោះមង ។
ករណីគ្រោះថ្នាក់ខាងលើបានកើតឡើងនៅវេលាម៉ោង០៥និង១៥នាទីព្រឹក ថ្ងៃទី៧ ខែកក្កដា ឆ្នាំ២០១៧ ស្ថិតលើកំណាត់ផ្លូវ RP174 ក្នុងភូមិឈើទាលជ្រុំ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ ។
តាមរបាយការណ៍លោកអនុសេនីយ៍ឯក ផន ជាង នាយផ្នែកចរាចរណ៍ស្រុកត្រពាំងប្រាសាទបានឲ្យដឹងថា មុនពេលកើតហេតុ ជនរងគ្រោះឈ្មោះ ធីង ធី ភេទប្រុស អាយុ ៦៥ឆ្នាំ រស់នៅ ភូមិអូរល្ហុង ឃុំអូរស្វាយ ស្រុកត្រពាំងប្រាសាទ បានបើកបរម៉ូតូ ម៉ាក សង់កូរ៉េ មានទឹសដៅពីកើតទៅលិច ក្នុងបំណងទៅដោះមង លុះដល់ចំណុចកើតហេតុ ដែលមានផ្លូវកោង ក៏មានរថយន្ត២គ្រឿង បើកបរទន្ទឹមគ្នាមានទឹសដៅពីលិចទៅកើត ខណៈនោះក៏មានរថយន្តមួយគ្រឿងទៀត ដែលជារថយន្តបង្ក ម៉ាកសាំយ៉ុងពណ៌ សំបកឪឡឹក ពាក់ស្លាកលេខ ភ្នំពេញ ២Q-១៥៨១បើកបរយ៉ាងលឿនមកជែងរថយន្តទាំង២ខាងមុខ ការជែងនោះរថយន្តបង្ករេចង្កួតមកខាងឆ្វេង រហូតដល់គំនូសស ចិញ្ចើមផ្លូវតែម្តង ទើបបណ្តាលឲ្យបុកម៉ូតូជនរងគ្រោះដែលកំពុងជិះនៅចិញ្ចើមផ្លូវខាងស្តាំរបស់គាត់យ៉ាងពេញទំហឹង រួចបន្តរបុករុញម៉ូតូ និងជនរងគ្រោះធ្លាក់ទៅក្នុងប្រឡាយប្រវែងជាង១០ម៉ែត្រទើបឈប់ ។
ក្រោយកើតហេតុ រថយន្តត្រូវបានកម្លាំងជំនាញយកមករក្សាទុកនៅអធិការដ្ឋាន ។ ចំណែកអ្នកបើកបរបានរត់គេចខ្លួនបាត់ កម្លាំងជំនាញកំពុងតាមស្រាវជ្រាវរកដើម្បីចាប់យកមកអនុវត្តតាមនូតិវិធីច្បាប់ ៕ ប៉ែន នួន
