លាន់ដូចរន្ទះរថយន្ត៤គ្រឿងបុកគ្នាបណ្តាលឲ្យរបួសធ្ងន់ម្នាក់

ខេត្តកំពង់ឆ្នាំង៖ រថយន្ត៤គ្រឿងបានរងការខូចខាត និង មនុស្សម្នាក់បានរងរបួសធ្ងន់ បន្ទាប់ពីរថយន្តទាំង៤គ្រឿង បានបុកបន្តគ្នា ស្នូរលាន់ដូចរន្ទះ ហេតុការណ៍នេះបានកើតឡើងកាលពីវេលាម៉ោង ១៤និង១៥នាទីល្ងាចថ្ងៃទី៩ ខែកក្កដា ឆ្នាំ២០១៧ នៅនៅផ្លូវជាតិលេខ៥ ចំណុចចន្លោះគីឡូម៉ែត្រលេខ៥០និង៥១ ស្ថិតនៅក្នុងភូមិតាកុល ឃុំពានី ស្រុកកំពង់ត្រឡាច ខេត្តកំពង់ឆ្នាំង។

សមត្ថកិច្ចនគរបាលមូលដ្ឋានបានឲ្យដឹងថា ករណីគ្រោះថ្នាក់ចរាចរណ៍នេះដំបូងបង្កឡើងដោយ រថយន្តម៉ាកឡិចស៊ីសពណ៌ស្ករពាក់ស្លាកលេខ ភ្នំពេញ 2Y 5936 បើកបរពីទិសខាងជើងទៅត្បូង បានមកបុកចំពីក្រោយរថយន្ត ម៉ាក DEAWOO ពណ៌ស ពាក់ស្លាកលេខ ភ្នំពេញ 2R 6405 បុក ហើយរថយន្តម៉ាក DEAWOOនោះ ក៏បានវិល ទៅបុករថយន្តម៉ាកហ៊ីយ៉ាន់ដាយ ពណ៌សពាក់ស្លាកលេខ ភ្នំពេញ 3C 4165 ក្នុងដំណើរច្រាស់ទិសគ្នា ហើយរថយន្ត DEAWOO មិនទាន់អស់ល្បឿន ក៏បានទៅបុករថយន្តម៉ាកហាយឡិនដឺ ពណ៌ទឹកមាស ពាក់ស្លាកលេខ ភ្នំពេញ 2H 8210ដោយមានអ្នកបើកបរឈ្មោះ លី លន ភេទប្រុស អាយុ49ឆ្នាំ រស់នៅក្នុងភូមិរំចក4 សង្កាត់រតនះ ក្រុងបាត់ដំបង ខេត្តបាត់ដំបង ក្នុងដំណើរច្រាស់ទិសគ្នា។

សមត្ថកិច្ចបានឲ្យដឹងទៀតថា នៅក្នុងហេតុការណ៏គ្រោះថ្នាក់នេះ បានបង្កឲ្យរងរបួសមនុស្សម្នាក់ ខូចរថយន្តចំនួន០៤គ្រឿង ក្នុងនោះធ្ងន់២គ្រឿង។ ចំពោះរថយន្តទាំង៤គ្រឿង ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកកំពង់ត្រឡាចដើម្បីរង់ចាំដោះស្រាយតាមនីតិវិធី ៕ ចន្ថា