សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មនុស្ស៣នាក់បានរងរបួសធ្ងន់ ខណៈត្រូវរថយន្តសាមុយរបស់មន្ទីរពេទ្យបង្អែកសម្តេចឪ បើកយ៉ាងលឿនប្រញាប់ទៅយកអ្នកជំងឺ ក៏ជ្រុលទៅបុកម៉ូតូកង់បីពីក្រោយពេញទំហឹង បណ្តាលក្រឡាប់ពីរបីត្រឡប់។
ហេតុការណ៍នេះកើតឡើងកាលពីវេលាម៉ោង១រំលងអធ្រាត្រ ឈានចូលថ្ងៃទី២១ ខែកក្កដា ឆ្នាំ២០១៧ ត្រង់ចំណុចសួនច្បារក្តាន់ពីរ តាមបណ្តោយផ្លូវសហព័ន្ធរុស្ស៊ី ស្ថិតក្នុងសង្កាត់មិត្តភាព ខណ្ឌ៧មករា រាជធានីភ្នំពេញ។
បើតាមប្រភពពីកន្លែងកើតហេតុបានប្រាប់ឲ្យដឹងថា មុនពេលកើតហេតុ គេឃើញម៉ូតូកង់បីមួយគ្រឿងម៉ាក បារចារ ពណ៌លឿង ពាក់ស្លាកលេខ 1FS-5173 បើកបរដោយបុរសម្នាក់ដឹកភ្ញៀវជានារីពីរនាក់ទៀត ធ្វើដំណើរតាមបណ្តោយផ្លូវសហព័ន្ធរុស្ស៊ី ក្នុងទិសដៅពីលិចទៅកើត ខណៈមកដល់កើតហេតុ ក៏បានស៊ីញ៉ូបត់ឆ្វេងដើម្បីចូលទៅផ្លូវបឹងកក់ ខណៈពេលនោះ ស្រាប់តែមានរថយន្តសង្គ្រោះរបស់មន្ទីរពេទ្យបង្អែកសម្តេចឪបើកមកពីក្រោយមួយគ្រឿងទៀត ពណ៌ស ពាក់ស្លាកលេខ រដ្ឋ ១២-២-០៩៩៥ បើកបរដោយបុរសម្នាក់ និងលោកគ្រូពេទ្យម្នាក់ទៀត ទើបតែដឹកអ្នកជំងឺញៀនថ្នាំទៅព្យាបាលនៅមន្ទីរពេទ្យមិត្តភាពខ្មែរសូវៀត រួចបើកត្រលប់ទៅដឹកអ្នកជំងឺលេបថ្នាំសម្លាប់ខ្លួននៅមន្ទីរពេទ្យបង្អែកសម្តេចឪវិញ ក្នុងល្បឿនយ៉ាងលឿន ក៏ជ្រុលទៅបុកម៉ូតូកង់បីពីក្រោយ បណ្តាលឲ្យក្រឡាប់ពីរបីត្រលប់បណ្ដោយអោយម៉ូតូកង់បីរងការខូចខាតយ៉ាងដំណំ និងមនុស្សប្រុសស្រី៣នាក់រងរបួសធ្ងន់ស្រាល រីឯរថយន្តសង្គ្រោះរបស់មន្ទីរពេទ្យបង្អែកសម្តេចឪរងការខូចខាតក្រពឹតបែកចង្កៀងផ្នែកខាងមុខចំហៀងខាងស្តាំ ។
ក្រោយកើតហេតុ រថយន្តបង្កមិនបានរត់ទៅណាទេ បានទូរស័ព្ទហៅរថយន្តសង្គ្រោះរបស់មន្ទីរពេទ្យកាល់ម៉ែតមកដឹកយកទៅសង្គ្រោះទៀតផង ។
បន្ទាប់មកសមត្ថកិច្ចមូលដ្ឋានបានទាក់ទងទៅជំនាញវាស់វែងយករថយន្ត និងម៉ូតូកង់បីទៅកាន់ការិយាល័យចរាចរជើងគោក នៃស្នងការនគរបាលរាជធានីភ្នំពេញ ដើម្បីដោះស្រាយតាមច្បាប់ ៕ ស រស្មី
