សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ មានការភ្ញាក់ផ្អើល និងឆោឡោទាំងព្រឹកដល់អ្នកភូមិ ក៏ដូចជាសមត្ថកិច្ចមូលដ្ឋានព្រមទាំងក្រុមគ្រួសារ ខណៈដែលប្រទះឃើញបុរសម្នាក់លង់ទឺកប្រឡាយស្លាប់កាលពីវេលាម៉ោង៦និង៣០នាទីព្រឹក ថ្ងៃទី២១ ខែកក្កដា ឆ្នាំ២០១៧ ស្ថិតនៅភូមិតាដេវ ឃុំមេសថ្ងក ស្រុកចន្ទ្រា។
យោងតាមសមត្ថកិច្ចនគរបាលស្រុកបានឲ្យដឹងថា បុរសដែលសង្ស័យស្លាប់ដោយសារលង់ទឺកមានឈ្មោះ ខៀវ សារ៉េត អាយុ៣០ ឆ្នាំ ( នៅលីវ) មុខរបរមិនពិតប្រាកដ មានទីលំនៅភូមិតាដេវ ឃុំមេសថ្ងក ស្រុកចន្ទ្រា។
បើតាមអ្នកភូមិបានឲ្យដឹងថា បុរសខាងលើគឺមានជំងឺវិកលចរឹកតាំងពីក្មេងមកម៉្លេះ ខណៈក្រុមគ្រួសារបានយកទៅព្យាបាលដែរ ប៉ុន្តែនៅតែមិនធូរស្រាលសោះ ក៏ទុកតាមដំណើរ ដោយគ្រួសារនេះមិនមានថវិកាគ្រប់គ្រាន់ ក្នុងការព្យាបាល។
ប្រភពបន្តថា ដោយមុនកើតហេតុគឺមានក្មេងឃ្វាលក្របីបានប្រទះឃើញសពក្នុងទឹកប្រឡាយ ក៏មានការភ្ញាក់ផ្អើលនិងរាយការណ៏មកសមត្ថកិច្ចតែម្ដង។
ក្រោយពីទទួលព័ត៌មានពីប្រជាពលរដ្ឋថា មានមនុស្សស្លាប់នៅទឹកប្រឡាយ ទើបកម្លាំងសមត្ថកិច្ចនគរបាលខេត្ត សហការជាមួយនគរបាលជំនាញ និងនគរបាលស្រុកបានចុះមកដល់កន្លែងកើតហេតុពិនិត្យសាកសពរួចមិនឃើញមានស្នាកស្នាមកត់សម្គាល់នោះទេពិតជាបានស្លាប់ដោយរអឹលជើងធ្លាក់ទឹកប្រឡាយពិតប្រាកដមែន ។
បន្ទាប់មកសមត្ថកិច្ចបានប្រគល់សាកសពទៅឲ្យឪពុកម្ដាយធ្វើបុណ្យតាមប្រពៃណី ៕ យឹម សុថាន
