សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងនគរបាលព្រហ្មទណ្ឌខណ្ឌពោធិ៍សែនជ័យ បានចុះទៅធ្វើការបង្ក្រាបនិងចាប់ខ្លួនក្រុមជួញដូរគ្រឿងញៀនបានចំនួន៣នាក់ ព្រមទាំងដកហូតបានគ្រឿងញៀនចំនួន៧កញ្ចប់មធ្យម រួមជាមួយវត្ថុតាងពាក់ព័ន្ធមួយចំនួនទៀតផងដែរ បន្ទាប់មកបាននាំទៅសាកសួរនៅប៉ុស្ដិ៍នគរបាលរដ្ឋបានចោមចៅមួយជំហ៊ាន សិនមុនពេលបញ្ជូនបន្តទៅកាន់ផ្នែកនគរបាលព្រហ្មទណ្ឌខណ្ឌពោធិ៍សែនជ័យចាត់ការបន្តនោះ។
ប្រតិបត្តិការខាងលើនោះបានធ្វើឡើង កាលពីវេលាម៉ោង១០ព្រឹក ថ្ងៃទី២៩ ខែកក្កដា ឆ្នាំ២០១៧ នៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ជនសង្ស័យដែលត្រូវនគរបាលឃាត់ខ្លួនបាននោះ ១,ឈ្មោះ ស៊ុន កាស៊ី អាយុ៣៥ឆ្នាំជាមេខ្លោងក្រុមជួញដូរគ្រឿងញឿន ២,ឈ្មោះ ថុល សុវណ្ណារិទ្ធ អាយុ១៧ឆ្នាំ ៣,ឈ្មោះ ថុន សុង អាយុ១៩ឆ្នាំ ពួកគេទាំង៣នាក់នោះស្នាក់នៅក្នុងភូមិខាងលើ។
នគរបាលបានឲ្យដឹងថា ការចាប់ខ្លួនក្រុមជួញដូរគ្រឿងញៀនខាងលើនោះ គឺកម្លាំងបានធ្វើឡើងតាមរយៈការស្រាវជ្រាវ គឺក្រុមនេះមិនមែនមានតែចំនួន៣នាក់នេះទេ ពួកគេមានគ្នារហូតដល់ទៅ៥នាក់ ដោយកាលពីវេលាម៉ោង២៣និង១៥នាទីថ្ងៃទី២៧ ខែកក្កដា កន្លងមកនេះកម្លាំងនគរបាលអន្តរាគមន៏ខណ្ឌពោធិ៍សែនជ័យ បានធ្វើការចាប់ខ្លួន បក្សពួកជនសង្ស័យបានចំនួន២នាក់ ខណៈពេលពួកគេកំពុងជិះម៉ូតូទៅចែកចាយគ្រឿងញៀន។ព្រមទាំងធ្វើការដកហូតបានវត្ថុតាងមួយចំនួនរួចមកហើយ នៅក្នុងខណៈនោះបាននាំទៅធ្វើការសាកសួរ ទើបដឹងថាពួកនោះមានមេខ្លោងធំម្នាក់ឈ្មោះ ស៊ុន កាស៊ី និងបក្សពួក២នាក់ផ្សេងទៀត បន្ទាប់កម្លាំងបានធ្វើការស្រាវជ្រាវបន្ត រហូតកំណត់បានពីទីតាំងលាក់ខ្លួនរបស់ជនទាំងនោះច្បាស់លាស់ហើយ ទើបឈានដល់ការចាប់ខ្លួនមេខ្លោងរូបនោះ រួមនិងបក្សពួកនាពេលនេះតែម្ដង។
ប្រភពដដែលបានបន្តទៀតថា ក្រោយពេលចាប់ខ្លួនជនសង្ស័យជាមេក្លោង និងបក្ខពួកខាងលើនោះ កម្លាំងនគរបាលបានដកហូតបានថ្នាំញៀនចំនួន៧កញ្ចប់មធ្យម ,ជញ្ជីងសម្រាប់ថ្លឹងគ្រឿងញៀន១គ្រឿង ព្រមទាំងសម្ភារៈពាក់ព័ន្ធមួយចំនួនទៀតផងដែរ បន្ទាប់មកបាននាំទៅសាកសួរនៅប៉ុស្ដិ៍នគរបាលរដ្ឋបានចោមចៅមួយជំហ៊ាន ដើម្បីបញ្ជូនបន្តទៅកាន់ផ្នែកនគរបាលព្រហ្មទណ្ឌខណ្ឌពោធិ៍សែនជ័យចាត់ការតាមច្បាប់៕ សុខាសែនជ័យ
