សារព័ត៌មាន នគរវត្ត តែងតែនាំមុខគេជានិច្ច
ខេត្តព្រៃវែង៖ រឿងអនុប្រធានពន្ធនាគារខេត្តព្រៃវែងអនុញ្ញាតឲ្យទណ្ឌិតប្រើប្រាស់ទូរស័ព្ទស្មាតហ្វូន និងកុំព្យូទ័រគំរាមទារប្រាក់ពីជនរងគ្រោះតាមបណ្តាញសង្គមហ្វេសប៊ុកមិនទាន់ដោះស្រាយចប់ផង ឥឡូវនេះ ស្រាប់តែលេចរឿងមន្ត្រី ពន្ធនាគារខេត្តព្រៃវែងវាយអ្នកទោសបណ្តាលឲ្យរបួសថែមទៀត។
ករណីហិង្សានេះ បើតាមបណ្ដាញទំនាក់ទំនងសង្គមហ្វេសប៊ុក ដែលកាលពីព្រឹក ថ្ងៃទី៣១ ខែកក្កដា ឆ្នាំ២០១៧ មានគណនីឈ្មោះ លីនី សម័យតេជោ ដោយចុះផ្សាយដាក់ចំណងជើងថា “មន្ត្រីប៉ូលីសក្នុងពន្ធនាគារខេត្តព្រៃវែង បានប្រើហិង្សាលើអ្នកទោសយ៉ាងសាហាវ” និងបានរៀបរាប់ត្រួសៗថា លោកវរៈសេនីយឯក ឃា ផា ប្រធានការិយាល័យប្រតិបត្តិ បានយកកៅអីវាយលើទណ្ឌិតឈ្មោះ អ៊ួន ចាន់រឿន បណ្ដាលឲ្យបែកក្បាលប្រវែង ២សង់ទីម៉ែត្រ នៅគ្រាដែលទណ្ឌិត និងទណ្ឌិត ក្នុងពន្ធនាគារខេត្តព្រៃវែងនោះ ឈ្លោះប្រកែកគ្នា។
លោក ជួប សារីម ប្រធានពន្ធនាគារខេត្តព្រៃវែង បានថ្លែងបញ្ជក់តាមទូរស័ព្ទ នៅព្រឹកថ្ងៃទី១ ខែសីហា ឆ្នាំ២០១៧ នេះ ថា រឿងចោទថា កូនចៅលោកវាយអ្នកទោសនោះគ្មានទេ គឺអ្នកទោស វាយគ្នាទៅវិញទៅមក ហើយកូនចៅលោកចូលទៅជួយឃាត់តែប៉ុណោះ។ លោកបន្ដថា នៅថ្ងៃនេះ លោកនឹងកោះហៅមន្ត្រីរបស់លោកមកសួរនាំ ពីបញ្ហានេះ ដើម្បីធ្វើរបាយការណ៍ជូនទៅខេត្ត។
ដោយឡែកលោកឧត្តមសេនីយត្រី សន កែវ អ្នកនាំពាក្យអគ្គនាយកដ្ឋានពន្ធនាគារ នៃក្រសួងមហាផ្ទៃបានថ្លែងបញ្ជាក់តាម Telegram ថា ចំពោះករណី ដែលផ្សាយមន្ត្រីពន្ធនាគារខេត្តព្រៃវែង ឈ្មោះ ឃា ផា បានវាយទណ្ឌិតបែកក្បាលនោះ បើយោងតាមរបាយការណ៍បឋមឲ្យដឹងថា ជារឿងមិនពិត។ លោកថា ករណីនេះ គឺជាវាយតប់គ្នារវាងជនជាប់ឃុំ និងជនជាប់ឃុំតែប៉ុណ្ណោះ ប៉ុន្តែនៅពេលដែលមន្ត្រីពន្ធនាគារ ចូលទៅឃាត់ក៏បណ្តាលឲ្យកៅអីប៉ះត្រូវជនជាប់ឃុំរូបនេះ បណ្តាលឲ្យរបួសនៅចុងចិញ្ចើមបន្តិច។
សូមបញ្ជាក់ថា គណនីហ្វេសប៊ុកឈ្មោះ លីនី សម័យតេជោ បានលុបចោលនៅអត្ថបទរបស់ខ្លួនភ្លាមៗ ក្រោយពីបង្ហោះបានប្រមានជាង១០នាទី ហើយគណនីដដែលនេះ ក៏បានបង្ហោះ អត្ថបទថ្មីភ្លាមៗមួយទៀត ដោយបានបញ្ជាក់ចុងក្រោយយ៉ាងដូច្នេះថា “នាងខ្ញុំលុបអត្ថបទអំពីអំពើហឹង្សាលើអ្នកទោស ក្នុងពន្ធនាគារខេត្តព្រៃវែង ដោយសារតែមានការខល មកសំណូមពរ ក៏ប៉ុន្តែនាងខ្ញុំនឹងផុសម្តងទៀត ដរាបណា មានអំពើហឹង្សាទៅលើទណ្ឌិត”៕ ហេង សូរិយា
