សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖កម្លាំងការិយាល័យប្រឆាំងគ្រឿងញៀនខេត្ត ដោយបានការចូលរួមសហការពីកម្លាំងប៉ុស្តិ៍នគរបាលរដ្ឋបាលសង្កាត់ស្វាយដង្គំ ចំណុះឱ្យអធិការនគរបាលក្រុងសៀមរាប ចុះបង្ក្រាបករណីរក្សាទុកនិងជួញដូរដោយខុសច្បាប់ក្នុងក្រុងសៀមរាប ឈានដល់ឃាត់ខ្លួនបានជនសង្ស័យចំនួន២នាក់ រួចនាំយកមកសួរនៅការិយាល័យជំនាញ ដើម្បីរៀបចំសំណុំរឿងបញ្ជូនទៅតុលាការ។ ហេតុការណ៍នេះបានធ្វើឡើងនៅវេលាម៉ោង០៩និង១០នាទីព្រឹក ថ្ងៃទី០៧ខែសីហាឆ្នាំ២០១៧ ស្ថិតនៅក្នុងផ្ទះ ភូមិស្វាយព្រៃ សង្កាត់ស្វាយដង្គំ ក្រុង/ខេត្តសៀមរាប ។
តាមប្រភពពីសមត្ថកិច្ចជំនាញខេត្តបានប្រាប់ថា ជនសង្ស័យទាំង២នាក់មាន៖ ទី១/ឈ្មោះ ហេង ហ៊ុន ហៅ អាក្តាម ភេទប្រុសអាយុ១៨ឆ្នាំមុខរបរគ្មានទីលំនៅភូមិស្វាយព្រៃ សង្កាត់ស្វាយដង្គំ ក្រុង ខេត្តសៀមរាប(រក្សាទុកនិងជួញដូរ)(មានសារធាតុញៀនក្នុងខ្លួន) និង ទី២/ឈ្មោះ ថា សុភ័ក្រ ភេទប្រុសអាយុ១៨ឆ្នាំ មុខរបរគ្មានទីលំនៅភូមិស្វាយព្រៃ សង្កាត់ស្វាយដង្គំ ក្រុង/ខេត្តសៀមរាប (សមគំនិតជួញដូរ)(មានសារធាតុញៀនក្នុងខ្លួន)។បន្ទាប់ពីសមត្ថកិច្ចឃាត់ខ្លួនសមត្ថកិច្ច ក្នុងនោះដកហូតបានវត្ថុតាងរួមមាន៖ ម្សៅមេតំហ្វេតាមីនប្រភេទទឹកកកចំនួន០៨កញ្ចប់ស្មើនឹងទំងន់១២,៥ក្រាម ទាំងសំបក,ទូរស័ព្ទដៃចំនួន ០២គ្រឿង,ឧបករណ៍ប្រើប្រាស់ថ្នាំញៀននិងសំភារៈវេចខ្ចប់ថ្នាំញៀនមួយចំនួន។
បច្ចុប្បន្នជនសង្ស័យនិងវត្ថុតាង ត្រូវបានកម្លាំងជំនាញ រៀបចំកសាងសំណុំរឿងបញ្ចូនទៅសាលាដំបូងខេត្ត នៅព្រឹកថ្ងៃទី០៨ខែសីហាឆ្នាំ២០១៧ នេះ ដើម្បីចាត់ការតាមផ្លូវច្បាប់៕ ប៊ុនរិទ្ធី
