ជនសង្ស័យ៣នាក់ និងថ្នាំញៀន១កញ្ចប់ត្រូវសមត្ថកិច្ចនគរបាលប៉ុស្ដិ៍ព្រែកប្រាបង្ក្រាបបាន

ភ្នំពេញ៖ កម្លាំងសមត្ថកិច្ចនគរបាលប៉ុស្តិ៍ព្រែកប្រា បានឃាត់ខ្លួនជនសង្ស័យ៣នាក់ រួមនឹងថ្នាំញៀន១កញ្ចប់តូច និងសម្ភារមួយចំនួនកាលពីលាម៉ោង១១ និង៣០នាទីយប់ ថ្ងៃទី៧ ខែសីហា ឆ្នាំ២០១៧ នៅផ្លូវបេតុង ក្នុងភូមិអូរអណ្ដូង សង្កាត់ព្រែកប្រា ខណ្ឌច្បារអំពៅ។

ជនសង្ស័យទាំង៣នាក់ ដែលសមត្ថកិច្ចឃាត់ខ្លួនខាងលើទី១.ឈ្មោះ ស្នា រតនា ភេទប្រុស អាយុ១៨ឆ្នាំ ជានជាតិខ្មែរ មានមុខរបរមិនពិតប្រាកដ ស្នាក់នៅផ្ទះគ្មានលេខ ផ្លូវលំ ក្នុងភូមិចុងព្រែក សង្កាត់ព្រែកឯង ខណ្ឌច្បារអំពៅ ទី២.ឈ្មោះ ហេង ស្វិត ភេទប្រុស អាយុ២០ឆ្នាំ ជនជាតិខ្មែរ មានមុខរបរមិនពិតប្រាកដ ស្នាក់នៅភូមិជ្រោយអំពិល សង្កាត់ព្រែកឯង ខណ្ឌច្បារអំពៅ និងទី៣.ឈ្មោះ សុខ អុី ភេទប្រុស អាយុ១៩ឆ្នាំ ជនជាតិខ្មែរ មានមុខរបរមិនពិតប្រាកដ ស្នាក់នៅភូមិចុងព្រែក សង្កាត់ព្រែកឯង ខណ្ឌច្បារអំពៅ។

ក្រោយការឃាត់ខ្លួននេះ សមត្ថកិច្ចបានដកហូតថ្នាំញៀនប្រភេទម្សៅក្រាមពណ៌សថ្លា១កញ្ចប់, ម៉ូតូម៉ាកហុងដាឌ្រីម ស៊េរីឆ្នាំ២០១៣ ពណ៌ខ្មៅ១គ្រឿង និងកុំព្យូទ័រយួដៃ១គ្រឿងផងដែរ។

លោក ឡូ ភារម្យ នាយប៉ុស្ត៍នគរបាលព្រែកប្រាបានប្រាប់ឲ្យដឹងថា មុនឈានដល់ការឃាត់ខ្លួន ជនសង្ស័យខាងលើ គឺកម្លាំងសមត្ថកិច្ចរបស់លោកបានល្បាតក្នុងមូលដ្ឋាន ដើម្បីទប់ស្កាត់បទល្មើសផ្សេងៗ។ ខណៈជិះម៉ូតូដល់ចំណុចផ្លូវបេតុង ក្នុងភូមិកើតហេតុខាងលើ ក៏ស្រាប់តែប្រទះឃើញជនសង្ស័យ៣នាក់ជិះម៉ូតូ១គ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០១៣ ពាក់ស្លាកលេខ ភ្នំពេញ 1R-3921 បើកបរក្នុងល្បឿនលឿន។ ដោយមានការសង្ស័យកម្លាំងសមត្ថកិច្ចបានឃាត់សុំត្រួតពិនិត្យ ស្រាប់តែរកឃើញថ្នាំញៀន១កញ្ចប់ដែលជនសង្ស័យលាក់ទុកនៅក្នុងហោប៉ៅ រួចកម្លាំងក៏បាននាំខ្លួនទៅសាកសួរនៅប៉ុស្តិ៍តែម្ដង។

បច្ចុប្បន្នជនសង្ស័យទាំង៣នាក់ព្រមទាំងវត្ថុតាងត្រូវបានសមត្ថកិច្ចកសាងសំណុំរឿងបញ្ជូនទៅអធិការដ្ឋាននគរបាលខណ្ឌច្បារអំពៅដើម្បីចាត់ការបន្តតាមច្បាប់៕ ភារ៉ា ដង្កោ