សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ នាក់៣នាក់ ២នាក់រងរបួសបាក់ជើង ម្នាក់ទៀតរងរបួសស្រាល បន្ទាប់ពីត្រូវរថយន្តបែនដឹកដីបើកបុកពេញមួយទំហឹង ខណៈកំពុងជិះម៉ូតូឌុបគ្នា កាលពីវេលាម៉ោង០៩ និង៥០នាទី ថ្ងៃទី១២ ខែសីហា ឆ្នាំ២០១៧ នៅលើផ្លូវលេខ២០បេ ត្រង់ចំណុចផ្លូវបែកជាបួន ស្ថិតក្នុងភូមិឈើនាង ឃុំគោកត្រប់ ស្រុកកណ្ដាលស្ទឹងខេត្តកណ្ដាល ។
មន្ត្រីនគរបាលចរាចរណ៍ស្រុកកណ្តាលស្ទឹងបានឲ្យដឹងថា ម៉ូតូម៉ាកស៊ុយហ្ស៊ូគីនិច ពណ៌ស ពាក់ស្លាកលេខកណ្តាល1P-4034 បើកបរដោយឈ្មោះ ប៉ុនឌី កញ្ញាពេជ្រ ភេទស្រី អាយុ១៦ឆ្នាំ (រងរបួសបាក់ជើងឆ្វេង) មានទីលំនៅភូមព្រែករកា ឃុំព្រែករកា ស្រុកកណ្ដាលស្ទឹង និងអ្នករួមដំណើរជាមួយ២នាក់ទៀត ម្នាក់រងរបួសបាក់ជើង ម្នាក់ទៀតរងរបួសស្រាល ។ ចំណែកឯរថយន្តម៉ាកនីសាន់ ពណ៌ខៀវ ពាក់ស្លាកលេខ ចង្កូតស្ដាំ TK-0269 ជាប្រភេទរថយន្តបែនដឹកដីបើកបរដោយឈ្មោះ ម៊ុត ចាន់ធឿន ភេទប្រុស អាយុ៤៨ឆ្នាំ នៅភូមិភូមិធំ ឃុំភូមិធំ ស្រុកកៀនស្វាយ ខេត្តកណ្ដាល ។
ប្រភពដដែលបានបន្តថា រថយន្ត និងម៉ូតូបើកបរខ្វែងទិសគ្នា លុះបើកដល់ចំណុចផ្លូវបែកជាបួន រថយន្តបានបើកបុកចំទទឹងម៉ូតូ ទើបបណ្តាលឲ្យនារីជាអ្នកបើកបរ និងនារីម្នាក់ទៀតដែលរួមដំណើរជាមួយរងរបួសបាក់ជើង ខណៈដែលនារីជាអ្នករួមដំណើរនៅខាងក្រោយរងរបួសស្រាល ។ ក្រោយពីមានហេតុការណ៍កើតឡើងអ្នកបើកបររថយន្ត ត្រូវបានសមត្ថកិច្ចនគរបាលស្រុកកណ្តាលស្ទឹងឃាត់ខ្លួនបណ្តោះអាសន្ន បញ្ជូនទៅកាន់អធិការដ្ឋានរួមជាមួយវត្ថុតាងពាក់ព័ន្ធ ដើម្បីចាត់ការតាមច្បាប់ ។ ដោយឡែកនារីរងគ្រោះត្រូវបានរថយន្តសាមុយដឹកបញ្ជូនទៅសង្រ្គោះនៅមន្ទីរពេទ្យ ក្នុងរាជធានីភ្នំពេញ ៕ ស្អាងជ័យ
