សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ ក្មេងប្រុសអាយុ១៥ឆ្នាំស្ពាយឧបករណ៍ចេញទៅដាក់ឆក់សត្វកណ្តុរ ខណៈដើរធ្វេសប្រហែស បណ្តាលឲ្យឆក់ខ្លួនឯងស្លាប់យ៉ាងអាណោចអាធ័ម បង្កឲ្យមានការភ្ញាក់ផ្អើលនៅវេលាម៉ោង១៨ និង៣០នាទី ថ្ងៃទី១៨ ខែសីហា ឆ្នាំ២០១៧ ត្រង់ចំណុចដីស្រែរបស់ឈ្មោះ អ៊ុល ណុច ស្ថិតក្នុងភូមិស្វាយអំពារ ឃុំស្វាយអំពារ ស្រុកមុខកំពូល ខេត្កកណ្ដាល ។
មន្ត្រីនគរបាលស្រុកមុខកំពូលបានឲ្យដឹងថា ក្មេងប្រុសរងគ្រោះឈ្មោះ ណុច វណ្ណនិត ភេទប្រុស អាយុ១៥ឆ្នាំ ជនជាតិខ្មែរ មុខរបរ កសិករ មានទីលំនៅភូមិស្វាយអំពារ ឃុំស្វាយអំពារ ស្រុកមុខកំពូល ។
ប្រភពដដែលបានបន្តថា នៅមុនពេលកើតហេតុក្មេងប្រុសរងគ្រោះបានរៀបចំខ្លួន និងស្ពាយឧបករណ៍ឆក់កណ្តុរចេញពីផ្ទះ ត្រូវបានស្ត្រីជាម្តាយហាមឃាត់ តែក្មេងប្រុសរូបនេះមិនស្តាប់នៅតែបន្តស្ពាយឧបករណ៍ដើរចេញពីផ្ទះឆ្ពោះទៅវាលស្រែ ។ មួយសន្ទុះក្រោយមកស្ត្រីជាម្តាយបានស្រែកហៅក្មេងប្រុសរងគ្រោះឲ្យត្រឡប់មកផ្ទះវិញ តែមិនមានការឆ្លើយតប ទើបស្ត្រីជាម្តាយប្រើបងប្អូនឲ្យជួយតាមរក រហូតប្រទះឃើញក្មេងប្រុសរងគ្រោះដេកស្លាប់នៅលើខ្សែលួស។
ក្រោយពីមាហេតុការណ៍កើតឡើងក្រុមគ្រួសារ បាននាំយកសាកសពក្មេងប្រុសរងគ្រោះមកកាន់លំនៅឋានរាយការណ៍ប្តឹងសមត្ថកិច្ច ។ សមត្ថកិច្ចបានបញ្ជាក់ថា នៅលើកំភួនដៃខាងឆ្វេងសាកសពចនរងគ្រោះមានស្លាប់ឆេះខ្លោចមួយកន្លែង ក្រៅពីនោះពុំមានស្លាកស្នាមអ្វីផ្សេងឡើយ ។ ការសន្និដ្ឋាន ជនរងគ្រោះស្លាប់ដោយសារឆក់និងខ្សែលួស ដែលខ្លួនបានរាយតភ្ជាប់ជាមួយអាំងវ៉ាទ័រ ចាប់ជាមួយភ្លើងអាគុយ បំឡែកសម្រាប់ឆក់សត្វកណ្ដុរ ។ ក្រោយពីពិនិត្យចប់សពគ្រប់សាកសពជនរងគ្រោះ ត្រូវបានប្រគល់ទៅឲ្យក្រុមគ្រួសារចាត់ចែងធ្វើបុណ្យតាមប្រពៃណី ៕ ស្អាងជ័យ
