សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ មុខសញ្ញាជួញដូរ និងប្រើប្រាស់គ្រឿងញៀន២នាក់ជិះម៉ូតូឌុបគ្នាត្រឡប់មកពីទិញគ្រឿងញៀនពីមេក្លោងនៅនៅឃុំកំពង់ស្វាយ ស្រុកកៀនស្វាយវិញ ក៏ត្រូវបានសមត្ថកិច្ចនគរបាលប៉ុស្តិ៍រដ្ឋបាលសិត្បូ នៃអធិការដ្ឋាននគរបាលស្រុកស្អាង បង្រ្កាបចាប់ខ្លួនបាន កាលពីវេលាម៉ោង១៨ និង៥០នាទី ថ្ងៃទី២៤ ខែសីហា ឆ្នាំ២០១៧ ត្រង់ចំណុចកំពង់ចម្លងកោះអន្លង់ចិន ស្ថិតក្នុងភូមិកំពង់ព្រីង ឃុំសិត្បូ ស្រុកស្អាង ខេត្តកណ្តាល ។
ក្នុងប្រតិបត្តិការបង្រ្កាបចាប់ខ្លួនជនសង្ស័យ សមត្ថកិច្ចបានធ្វើការដកហូតវត្ថុតាងរួមមាន៖ ថ្នាំញៀនប្រភេទមេតំហ្វេតាមីន ហៅម៉ាទឹកកកចំនួន២៧កញ្ចប់ ,ម៉ូតូ០១គ្រឿង ម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ កណ្តាល1T-5575 និងទូរស័ព្ទដៃ០២គ្រឿងផងដែរ ។
មន្ត្រីនគរបាលប្រឆាំងគ្រឿងញៀនស្រុកស្អាងបានឲ្យដឹងថា ជនសង្ស័យ២នាក់ដែលត្រូវបានចាប់ខ្លួននោះ ទី១-ឈ្មោះ អយ សុខគឿន ហៅអូនទូច ភេទប្រុស អាយុ២០ឆ្នាំ ជនជាតិខ្មែរ មុខរបរ ជាងផ្សាដែក មានទីលំនៅភូមិកំពង់ព្រីង ឃុំសិត្បូ ទី២-ឈ្មោះ អ៊ី វិចិត្ត ភេទប្រុស អាយុ២៦ឆ្នាំ ជនជាតិខ្មែរ មុខរបរ បើកបរឡាន មានទីលំនៅភូមិព្រែកដូង២ ឃុំកំពង់ស្វាយ ស្រុកកៀនស្វាយ ខេត្តកណ្តាល ។
ប្រភពដដែលបានបន្តថា ជនសង្ស័យទាំង២នាក់នេះជាមុខសញ្ញាជួញដូរ និងប្រើប្រាស់គ្រឿងញៀន ម្នាក់ជាមុខសញ្ញានៅក្នុងមូលដ្ឋាន ម្នាក់ទៀតជាមុខសញ្ញាក្រៅមូលដ្ឋាន ពួកគេទាំង២នាក់តែងតែទំនាក់ទំនងជួញដូរគ្រឿងញៀន ដោយប្រើប្រាស់គ្រប់រូបភាព ដើម្បីបំភ័ន្តភ្នែកសមត្ថកិច្ច ។ លុះមកដល់ល្ងាចថ្ងៃទី២៤ ខែសីហា ឆ្នាំ២០១៧ សមត្ថកិច្ចនគរបាលប៉ុស្តិ៍បានទទួលព័ត៌មានពីប្រជាពលរដ្ឋថា បានប្រទះឃើញជនសង្ស័យជិះម៉ូតូឌុបគ្នាឆ្លងទូកដរទៅភូមិសាស្ត្រស្រុកកៀនស្វាយ ទើបសមត្ថកិច្ចនគរបាលប៉ុស្តិ៍ចុះធ្វើការស្រាវជ្រាវចាំឃ្លាំមើល រហូតបានឃើញជនសង្ស័យទាំង២នាក់ជិះត្រឡប់មកវិញ ក៏ឆ្មក់ចូលទៅសុំធ្វើការឆែកឆររកឃើញវត្ថុតាងជាក់ស្តែងចាប់ខ្លួនបញ្ជូនទៅកាន់អធិការដ្ឋាននគរបាលស្រុក ដើម្បីធ្វើការសាកសួរ និងកសាងសំណុំរឿងចាត់ការតាមច្បាប់ ។
ជនសង្ស័យឈ្មោះ អ៊ី វីចិត្ត បានសារភាពប្រាប់សមត្ថកិច្ចនគរបាលថា មុនពេលកើតហេតុរូបគេបានទំនាក់ទំនងតាមទូរស័ព្ទ ហៅជនសង្ស័យឈ្មោះ ឈ្មោះ អយ សុខគឿន ដើម្បីយកម៉ូតូមកឌុបរូបគេ ជិះទៅទិញគ្រឿងញៀនពីមេក្លោងឈ្មោះ សេង ភេទ ប្រុស អាយុ៣០ឆ្នាំ រស់នៅភូមិព្រែកដូង២ ឃុំកំពង់ស្វាយ ស្រុកកៀនស្វាយ ខេត្តកណ្តាល ចំនួន២៧កញ្ចប់តូច ក្នុងតំលៃ១៣០,០០០រៀល ដើម្បីយកទៅជួញដូរបន្តនៅក្នុងភូមិសាស្ត្រឃុំសិត្បូ ស្រុកស្អាង ។ ចំណែកឯជនសង្ស័យឈ្មោះ អយ សុខគឿន បានសារភាពថា រូបគេពិតជាបានយកម៉ូតូមកដឹកជនសង្ស័យឈ្មោះ អ៊ី វិចិត្ត ប្រាកដ ៕ ស្អាងជ័យ
