សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ប្រុសស្រី៣នាក់ បានរងរបួស ដោយសារករណីគ្រោះថ្នាក់ចរាចរណ៏រវាងម៉ូតូ នឹងម៉ូតូ ដែលបើកស្របទិសគ្នា ហើយបត់ឆ្វេងខ្វះការប្រុងប្រយ័ត្ន កាលពីវេលាម៉ោង ០៧និង៥៥ នាទីព្រឹក ថ្ងៃទី៣ ខែកញ្ញា ឆ្នាំ២០១៧ លើផ្លូវជាតិលេខ ០១ ចន្លោះគីឡូម៉ែតលេខ ១២៥/១២៦ ស្ថិតនៅភូមិ បាក់រនាស់ សង្កាត់ សង្ឃ័រ ក្រុង ស្វាយរៀង។
យោងតាមសមត្ថកិច្ចនគរបាលក្រុងស្វាយរៀងបានឲ្យដឹងថា ចំពោះម៉ូតូ ដែលបត់ឆ្វេងខ្វះប្រុងប្រយត្ន័ម៉ាក គុបមូល ពណ៌ ស គ្មានស្លាកលេខ បើកបរដោយឈ្មោះ កៅ បូរី ភេទ ប្រុស អាយុ ១៦ ឆ្នាំ មុខរបរ សិស្ស រស់នៅភូមិ ថ្នល់កែង សង្កាត់ ពោធិតាហោ ក្រុង ស្វាយរៀង ខេត្ត ស្វាយរៀង។
ចំណែកភាគីរងគ្រោះជិះ ម៉ូតូម៉ាក សេ ១២៥ ពណ៌ ខ្មៅ ពាក់ស្លាកលេខ ភ្នំពេញ ១FU ៤០០៨ បើកបរដោយឈ្មោះ ជី ថារី ភេទ ប្រុស អាយុ ៣៥ ឆ្នាំ មុខរបរ កម្មករសំណង់ រស់នៅ ភូមិ ត្រពាំងក្រែត ឃុំ ជ្រុងពពែល ស្រុក រំដួល ខេត្ត ស្វាយរៀង និងអ្នករួមដំណើរឈ្មោះ ចាន់ ដានី ភេទ ស្រី អាយុ ៣៥ ឆ្នាំ មុខរបរ កម្មករសំណង់ រស់នៅភូមិ ឃុំជាមួយគ្នា។
បើតាមសាក្សីបានឲ្យដឹងថា មុនកើតហេតុមានម៉ូតូ ម៉ាក គុបមូល ពណ៌ស គ្មានស្លាកលេខ បើកបរដោយបុរសម្នាក់ ដែលធ្វើដំណើរពីកើតមកលិចហើយបានបត់ឆ្វេងមិនប្រយត្ន័ស្រាប់តែមានម៉ូតូ,ម៉ូតូម៉ាក សេ ១២៥ ពណ៌ ខ្មៅ ពាក់ស្លាកលេខ ភ្នំពេញ ១FU ៤០០៨ ជិះគ្នា២នាក់មកពីក្រោយស្របបទិសគ្នាចាប់ហ្វ្រាំងមិនទាន់ បុកពេញទំហឹងលាន់សូរដូចរន្ទះបណ្ដាលឲ្យខ្ទាតមនុស្ស និងម៉ូតូប្រមាណ៥ម៉ែត្ររណូករណែលពេញផ្លូវ ត្រូវបានអ្នកភូមិក៏ដូចជាអ្នកធ្វើដំណើររាយការណ៍មកសមត្ថកិច្ចមូលដ្ឋានមកអន្តរាគមន៍ ដឹកភាគីទាំងសងខាងមកព្យាបាលនៅមន្ទីរពេទ្យខេត្តស្វាយរៀង។
រីឯមធ្យោបាយម៉ូតូពីរគ្រឿង ត្រូវបានសមត្ថកិច្ចវាស់វែង និងអូសមករក្សាទុកនៅអធិការក្រុងស្វាយរៀងដើម្បីចាត់ការបន្តតាមច្បាប់ ៕ យឹម សុថាន
