សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ៤នាក់ត្រូវបានកម្លាំងនគរបាលប៉ុស្តិ៍រដ្ឋបាលឃ្មួញឆ្មក់បង្ក្រាបឃាត់ខ្លួនបន្ទាប់ពីពួកគេបានប្រមូលផ្តុំគ្នាប្រើប្រាស់គ្រឿងញៀន។
ការឃាត់ខ្លួនជនសង្ស័យទាំង៤នាក់ខាងលើនេះកាលពីវេលម៉ោង៩និង១០នាទីព្រឹក ថ្ងៃទី៤ ខែកញ្ញា ឆ្នាំ២០១៧ នៅចំណុចបន្ទប់ជួល ភូមិសែនសុខ៤ សង្កាត់ឃ្មួញ ខណ្ឌសែនសុខ។
ជនសង្ស័យទាំង៤នាក់ ដែលឃាត់ខ្លួននោះទី១ឈ្មោះ អាន សីហា ភេទប្រុស អាយុ២១ឆ្នាំ មុខរបរធ្វើសំណង់ ស្នាក់នៅបន្ទប់ជួលផ្លូវលំភូមិសែនសុខ៤សង្កាត់ឃ្មួញ ទី២ឈ្មោះ កង វុទ្ធី ភេទប្រុសអាយុ១៩ឆ្នាំ មុខរបរមិនពិតប្រាកដស្នាក់នៅភូមិសែនសុខ៧សង្កាត់ឃ្មួញ ទី៣ឈ្មោះ ណាំ ចន្ថា ភេទប្រុសអាយុ២០ឆ្នាំ មុខរបរមិនពិតស្នាក់នៅបន្ទប់ជួល ផ្លូវលំ ភូមិភ្នំពេញថ្មី សង្កាត់ភ្នំពេញថ្មី និង ទី៤ឈ្មោះ ហង្ស ប៊ុនផេន ហៅដា ភេទប្រុសអាយុ៣២ឆ្នាំ មុខរបរមិនពិត ស្នាក់នៅភូមិសែនសុខ៤ សង្កាត់ឃ្មួញ។
លោក អនុសេនីយ៍ឯក ញាណ នន នាយប៉ុស្តិ៍នគរបាលរដ្ឋបាល សង្កាត់ឃ្មួញ បានឲ្យដឹងថា មុននិងឃាត់ខ្លួនក្រុមជនសង្ស័យទាំង៤នាក់ខាងលើនេះគឺបន្ទាប់ពីមានប្រជាពលរដ្ឋល្អបានរាយការណ៍ថា មានក្រុមក្មេងស្ទាវកំពុងប្រមូលផ្តុំគ្នាសង្ស័យប្រើប្រាស់គ្រឿង ពេលនោះលោកបានដឹកនាំកម្លាំងចុះដល់កន្លែងទីតាំងខាងលើ ឃើញពួកគេកំពុងប្រើប្រាស់គ្រឿងញៀនជាក់ស្តែង ក៏ឃាត់ខ្លួនតែម្តង និងដកហូតឧបករណ៍សម្រាប់ប្រើប្រាស់មួយចំនួន។
បច្ចុប្បន្នក្រុមជនសង្ស័យទាំង៤នាក់កំពុងកសាងសំណុំរឿងបញ្ជួនទៅកាន់អធិការដ្ឋាននគរបាលខណ្ឌសែនសុខចាត់ការបន្តតាមនីតិវិធី៕ តុង សីហា
