សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ ៖ ជនសង្ស័យម្នាក់ក្នុងចំណោមបក្ខពួក ០២ នាក់ ត្រូវបានកម្លាំងសមត្ថកិច្ចឃាត់ខ្លួន ដែលហេតុការណ៍ឃាត់ខ្លួននេះធ្វើឡើងនៅថ្ងៃទី ២៣ ខែកញ្ញា ឆ្នាំ២០១៧ វេលាម៉ោង១០និង៣០នាទី នៅចំណុចភូមិទន្លេរបាទី ឃុំក្រាំងធ្នង់ ស្រុកបាទី ខេត្តតាកែវ។
យោងតាមរបាយការណ៍របស់អធិការដ្ឋាននគរបាលស្រុកបាទី បានអោយដឹងថា
កម្លាំងជំនាញអធិការដ្ឋានសហការជាមួយកម្លាំងប៉ុស្តិ៍នគរបាលរដ្ឋបាលក្រាំងធ្នង់ បានបង្រ្កាបករណីជួញដូរ និងប្រើប្រាស់សារធាតុញៀនខុសច្បាប់ ដោយបានឃាត់ខ្លួនជសង្ស័យ០១នាក់ មានឈ្មោះ ញូង នឹង ភេទប្រុស អាយុ ២៣ឆ្នាំ ទីលំនៅភូមិ-ឃុំកើតហេតុ ខណៈដែលកំពុងចែកចាយ និង ប្រើប្រាស់សារធាតុញៀន ចំណែកបក្ខពួកម្នាក់ទៀតដែលបានរត់គេចខ្លួនមាន ឈ្មោះ អុល លី ភេទប្រុស អាយុ ១៩ឆ្នាំ មានទីលំនៅភូមិ-ឃុំជាមួយគ្នា ។
ក្រោយឃាត់ខ្លួនជនសង្ស័យខាងលើ សមត្ថកិច្ចដកហូតបានវត្ថុតាងរួមមានៈ ម្សៅក្រាមពណ៌ស ០១កញ្ចប់ធំ និង ០៤កញ្ចប់តូច ទូរស័ព្ទដៃចំនួន ០៣គ្រឿង ដាវសាំមូរ៉ៃ ០១ដើម កន្ត្រៃ ០១ និងសម្ភារសម្រាប់វិចខ្ចប់ និងប្រើប្រាស់មួយចំនួនទៀត ។
បច្ចុប្បន្នជនសង្ស័យខាងលើ សមត្ថកិច្ចកំពុងសាកសួរដើម្បីកសាងសំណុំរឿង បញ្ជូនទៅសាលាដំបូងខេត្ត និងស្វែងរកចាប់ខ្លួនជនសង្ស័យដែលកំពុងរត់គេចខ្លួនមកផ្តន្ទាទោស ៕ ភ្នំដា
