ប្រុសស្រី២នាក់បានជិះម៉ូតូម៉ាកZoomer-X មិនដឹងយ៉ាងម៉េចស្រាប់តែដួលអូសចូលក្រោមរថយន្ត បណ្តាលរងរបួសធ្ងន់ស្រាលទាំង២នាក់

ភ្នំពេញ: ប្រុសស្រី២នាក់ជាសង្សារនឹងគ្នាបានរងរបួសធ្ងន់ស្រាលទាំង២នាក់ ខណៈជិះម៉ូតូម៉ាក Zoomer-X ក្នុងល្បឿនលឿន មិនដឹងយ៉ាងម៉េចស្រាប់តែដួលអូសចូលក្រោមរថយន្តម៉ាសស្ដា ។ហេតុការណ៍កើតឡើងនៅវេលាម៉ោង ៩ និង៣៥នាទីយប់ ថ្ងៃទី២៧ ខែកញ្ញា ឆ្នាំ២០១៧ ត្រង់ចំណុចមុខផ្ទះលេខ ១៣១ សង្កាត់ទួលស្វាយព្រៃ១ ខណ្ឌចំការមន រាជធានីភ្នំពេញ។

បើតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេឃើញប្រុស ស្រី២នាក់ ជិះម៉ូតូ១គ្រឿង ម៉ាកZoomer-X ពណ៌ស លាយទឹកក្រូច ពាក់ស្លាកលេខ ភ្នំពេញ1GN-8936 ក្នុងទិសដៅពីកើតទៅលិចក្នុងល្បឿនលឿន លុះមកដល់ចំណុចកើតហេតុ មិនដឹងយ៉ាងម៉េច ស្រាប់តែដួលម៉ូតូអូសប្រហែលជាង១០ម៉ែត្រ ជ្រុលទៅចូលក្រោមរថយន្តម៉ាក ម៉ាសស្ដា ពណ៌ប្រផះ ពាក់ស្លាកលេខ ភ្នំពេញ2AC-1999 ដែលឈប់បញ្ច្រាសទិសដៅគ្នា បណ្តាលអោយរងរបួសធ្ងន់ទាំង២នាក់ ហើយភ្លាមៗនោះក៏ត្រូវបានរថយន្តដឹកទៅសង្គ្រោះនៅគ្លីនិចឯកជន។

ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ វាស់វែង និងយកម៉ូតូរថយន្តទាំង២គ្រឿងមករក្សាទុកនៅអធិការដ្នាននគរបាលខណ្ឌចំការមនរង់ចាំការដោះស្រាយគ្នាពេលក្រោយ៕ ស រស្មី