សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្មេងស្ទាវ៤នាក់ត្រូវ សមត្ថកិច្ចខណ្ឌចំការមនឃាត់ខ្លួន បន្ទាប់ពីប្រដាប់ដោយដាវសាំមូរ៉ៃដេញវាយគ្នាតាមផ្លូវសាធារណៈ។
ហេតុការណ៍នេះកើតឡើងនៅវេលាម៉ោង១នាទីរំលងអធ្រាត្រ ឈានចូលថ្ងៃទី១៣ ខែតុលា ឆ្នាំ២០១៧ ស្ថិតនៅម្តុំផ្សារកុងតឺន័រ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
បើតាមប្រភពពីសមត្ថកិច្ចបានប្រាប់ឲ្យដឹងថា ក្រុមក្មេងស្ទាវដែលត្រូវសមត្ថកិច្ចឃាត់ខ្លួនឈ្មោះ ហេង ប្រណី ភេទប្រុស អាយុ១៧ឆ្នាំ មុខរបរជាសិស្ស ស្នាក់នៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ, ឈ្មោះថា លឹម ជូលី ភេទប្រុស អាយុ១៧ឆ្នាំ មុខរបរនៅផ្ទះ ស្នាក់នៅសង្កាត់បឹងទំពុន ខណ្ឌមានជ័យ រាជធានីភ្នំពេញ, ឈ្មោះថា រី សាបុត្រ ភេទប្រុស អាយុ១៩ឆ្នាំ មុខរបរនៅផ្ទះ ស្នាក់នៅសង្កាត់បឹងទំពុន ខណ្ឌមានជ័យ រាជធានីភ្នំពេញ និងឈ្មោះថា សឿង សិលា អាយុ២៧ឆ្នាំ មុខរបរនៅផ្ទះ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ក្រោយពីសមត្ថកិច្ចប៉ុស្តិ៍ទន្លេបាសាក់សួរនាំក្មេងស្ទាវខាងលើ បានប្រាប់សមត្ថកិច្ចឲ្យដឹងថា ពួកគេ មិនមែនជាអ្នករ៉ៃគ្នានោះទេ មុនពេលកើតហេតុ ពួកគេ មានគ្នា៤នាក់ បានជិះម៉ូតូ២គ្រឿងមានម៉ាក ហុងដាឌ្រីមសេ១២៥ ពណ៌ខ្មៅ ពាក់ស្លាកលេខ ភ្នំពេញ1GK- 9235 ឌុបគ្នា២នាក់ និង១គ្រឿងទៀត ម៉ាកហុងដាឌ្រីមសេ១២៥ ពណ៌ខ្មៅ មានពាក់ស្លាកលេខ ភ្នំពេញ1FO- 6175 ឌុបគ្នា២នាក់ដែរ ហើយបានជិះទៅទិញផ្លែឈើ នៅម្តុំណាហ្គាវើល ខណៈទិញរួច បានជិះចេញមក បម្រុងទៅផ្ទះ លុះមកដល់ចំណុចផ្លូវបំបែកក្បែរផ្សារកុងតឺន័រ ក៏ឃើញ ក្មេងស្ចាវមួយក្រុមមានគ្នា៦ទៅ៧ម៉ូតូ មិនដឹងរឿងអី្វផង ក៏ស្រាប់តែនាំគ្នាដេញតាមវាយពួកគេតែម្តង ភ្លាមៗនោះ ពួកគេ ក៏នាំគ្នាជិះម៉ូតូរត់គេចចូលមកឲ្យសមត្ថកិច្ចជួយអន្តរាគមន៍ ប៉ុន្តែសមត្ថកិច្ចបែរជាចោទពួកគេជាអ្នកវាយគេទៅវិញ ។
ប៉ុន្តែទោះបីយ៉ាងណា បច្ចុប្បន្ននេះយុវជនទាំង៤នាក់ខាងលើ ត្រូវបានសមត្ថកិច្ចប៉ុស្តិ៍នគរបាលរដ្ឋបាលទន្លេបាសាក់បញ្ជូនទៅអធិការដ្នាននគរបាលខណ្ឌចំការមនដើម្បីស្រាវជ្រាវបន្ត៕ ស រស្មី
