សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងសមត្ថកិច្ចនគរបាលខណ្ឌជ្រោយចង្វា ឃាត់ខ្លួនជនសង្ស័យប្រើប្រាស់ និងជួញដូរគ្រឿងញៀន៣នាក់ ដកហូតថ្នាំញៀន៦កញ្ចប់ រួមជាមួយម៉ូតូ១គ្រឿង កាលពីល្ងាចថ្ងៃទី១៤ ខែតុលា ឆ្នាំ២០១៧ នៅចំណុចខាងមុខសាលាកសិកម្ម តាមបណ្ដោយផ្លូវជាតិលេខ៦ ស្ថិតក្នុងភូមិព្រែកលៀប សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។
សមត្ថកិច្ចនគរបាលខណ្ឌជ្រោយចង្វា បានឲ្យដឹងថា ជនសង្ស័យឃាត់ខ្លួនខាងលើទី១-ឈ្មោះ យែម ហៀត អាយុ២៦ឆ្នាំ មុខរបរនៅផ្ទះ ទី២-ឈ្មោះ យ៉ា រ៉ូសាត អាយុ២៩ឆ្នាំ មុខរបរបើកឡាន ទី៣-ឈ្មោះ សុះ ស្មាលអែល អាយុ២៥ឆ្នាំ មុខរបរជាងម៉ូតូ ជនសង្ស័យទាំង៣នាក់ មានទីលំនៅភូមិស្វាយតាចាន់ ឃុំព្រែករំដេង ស្រុកស្រីសន្ធរ ខេត្តកំពង់ចាម។
សមត្ថកិច្ចនគរបាលខណ្ឌជ្រោយចង្វាថា មុនពេលឃាត់ខ្លួនយុវជនសង្ស័យទាំង៣នាក់នេះ គឺកម្លាំងនគរបាលផ្នែកគ្រឿងញៀន និងកម្លាំងផ្នែកអន្តរាគមន៍ខណ្ឌ បានសហការត្រួតពិនិត្យបទល្មើសចរាចរផ្លូវគោក តាមគោលដៅដែលបានកំណត់ ខណៈកំពុងប្រតិបត្តិការ ស្រាប់តែប្រទះឃើញពួកគេ ជិះម៉ូតូ១គ្រឿងម៉ាកហុងដាសង់ឌ្រីម សេ១២៥ ពណ៌ខ្មៅ សេរីឆ្នាំ២០១៦ ពាក់ស្លាកលេខ 1D-7151 ក្រចេះ ដោយមានការសង្ស័យ ទើបឃាត់ត្រួតពិនិត្យរកឃើញ ក្រាមសថ្លា ជាប្រភេទថ្នាំញៀនចំនួន៦កញ្ចប់តូច បម្រុងយកទៅធ្វើសកម្មភាពចែកចាយបន្ត។
បន្ទាប់ពីឃាត់ខ្លួនជនសង្ស័យពាក់ព័ន្ធករណីជួញដូរគ្រឿង និងវត្ថុតាង ដែលដកហូតបានពីប្រតិបត្តិការ ត្រូវបញ្ជូនមកកាន់អធិការដ្ឋាននគរបាលខណ្ឌជ្រោយចង្វាដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមបន្តតាមនីតិវិធី៕ ជ្រោយពេជ្រ
