សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ជ័រកៅស៊ូ៦០០ជាងហិកតាផលិតលើកដំបូងដាំដុះជាលក្ខណៈគ្រួសារ និងសហគមន៍លើទឹកដីស្រុករមាសហែកនៅតាមបណ្តាឃុំមួយចំនួនជាច្រើនតោនត្រូវបាននាំចេញទៅកាន់ទីផ្សារជាតិ និងអន្តរជាតិបន្ទាប់ពីក្រុមកសិករដាំបានផលហើយជ័រកៅស៊ូលក់បានថោក និងត្រូវដឹកយកទៅលក់ឲ្យខាងរោងចក្រនៅខេត្តត្បូងឃ្មុំ និងលក់ទៅក្រៅស្រុកប្រទេសជិតខាង ដែលមានចង្ងាយឆ្ងាយត្រូវចំណាយថវិកាច្រើន។
បើតាមលោក ដួង សេដ្ឋា ប្រជាពលរដ្ឋជាម្ចាស់ចំការកៅស៊ូនៅក្នុងភូមិ ព្រែករមៀត ឃុំ ជ្រៃធំ ស្រុក រមាសហែក ខេត្តស្វាយរៀងប្រាប់ឲ្យដឹងថា៖ការដាំណាំកៅស៊ូគឺវាមិនស្រួលនោះដោយចាប់ដាក់ដាំរហូតមកដល់ទទួលគឺមានរយៈពេល៨ទៅ១០ឆ្នាំទើបទទួលបានផលហើយក្នុងការប្រមូលផលក្នុង១ខែលក់បាន២ដងពោលគឺរយៈពេល១៥ថ្ងៃលក់ម្តងហើយក្នុងមួយខែអាចបានផលចាប់ពី៣ទៅ៤តោន។
ដោយមើលឃើញទីផ្សារជ័រកៅស៊ូល្អនៅប៉ុន្មានឆ្នាំមុននេះលោកនិងក្រុមគ្រួសារគាត់បានដាំកៅស៊ូបាន១០ហិកតាជាងក្នុងមួយហិកតាដាក់ដាំកូនកៅស៊ូបាន៥០០ទៅ៦២០ដើមហើយបច្ចុប្បន្ននេះដំណាំកៅស៊ូរបស់លោកនិងអ្នកផ្សេងទៀតព្រមទាំងសហគមន៍ទទួលបានផលជាបន្តបន្ទាប់ដោយក្នុងផ្ទៃដី១០ហិកតាជាងក្នុងមួយថ្ងៃគឺបានផលពីដើមកៅស៊ូពី២០០ទៅ៣០០គីឡូក្រាមជ័រទឹកជ័រកៅស៊ូកកលក់ចេញបានក្នុង១គីឡូ២៧០០ដល់៣០០០រៀលវាធ្លាក់ថ្លៃជាប៉ុន្មានឆ្នាំមុនណាមួយត្រូវដឹកយកទៅលក់ឲ្យខាងក្រុមហ៊ុនក្នុងស្រុកនិងប្រទេសជិតខាង។
លោក ចាប ណុល អភិបាលរងស្រុករមាសហែកបានឲ្យដឹងថា ជុំវិញការដាំដុះដំណាំកៅស៊ូនៅក្នុងស្រុករមាសហែកគឺចំនួន៦ឃុំស្មើរ៦៣៥ហិកតាសរុបទូទាំងស្រុករមាសហែក។ លោក ចាប ណុល បានបញ្ជាក់ថា៖អាជ្ញាធរស្រុកបានធ្វើទំនាក់ទំនងជាមួយនិងវិស័យឯកជនដែលមានចំណាប់អារម្មណ៍ជុំវិញទៅនិងផលិតផលកៅស៊ូរបស់ប្រជាពលរដ្ឋជាបន្តបន្ទាប់អោយពួកគេមកបង្កើតទីផ្សារប្រមូលទិញជ័រកៅស៊ូក្នុងស្រុកនេះហើយដែរ ប៉ុន្តែដូចជាគ្មានក្រុមហ៊ុនណាមួយមកបង្កើតដើម្បីទិញនោះទេ។
លោក អភិបាលរងស្រុកក៏បានអំពាវនាវដល់រាជរដ្ឋាភិបាលក៏ដូចជាក្រុមហ៊ុនដែលប្រមូលទិញជ័រកៅស៊ូជួយបង្កើតរោងចក្រទទួលទិញផងផលិតផលដែលខាងកសិករយើងខំធ្វើបានផលហើយពិបាកលក់ពោលត្រូវចំណាយប្រាក់ច្រើនក្នុងការដឹកផលិតផលជ័រកៅស៊ូ៕ យឹម សុថាន
