សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ស្ថានទូតសាធារណរដ្ឋកូរ៉េ ប្រចាំនៅកម្ពុជាបានរៀបចំព្រឹត្តិការណ៍ នៃការសម្តែងទស្សនីយភាពសិល្បៈមួយ ដើម្បីអបអរសាទរគម្រប់ខួប២០ឆ្នាំ នៃការបង្កើតទំនាក់ទំនងការទូតឡើងវិញ រវាងកម្ពុជា និងកូរ៉េ។ កម្មវិធីនេះ ត្រូវបានធ្វើឡើងកាលពីរាត្រីថ្ងៃទី១៩ ខែតុលា ឆ្នាំ២០១៧ នៅសាលចតុមុខ ក្រោមវត្តមានភ្ញៀវជាតិ និងអន្តរជាតិជាច្រើនកុះករ។
កាលពីថ្ងៃទី១១ ខែតុលាកន្លងទៅនេះ ស្ថានទូតនៃសាធារណរដ្ឋកូរ៉េប្រចាំកម្ពុជា បានរៀបចំប្រារព្វពិធីខួបគម្រប់២០ឆ្នាំនៃ ទំនាក់ទំនងកិច្ចសហប្រតិបត្តិការការទូតជាមួយកម្ពុជានៅសណ្ឋាគារអាំងទែកុងទីណង់តាល់។ ព្រឹត្តិការណ៍សម្តែងសិល្បៈនេះ ស្ថានទូតសាធារណរដ្ឋកូរ៉េបានរៀបចំឲ្យមានការសម្តែង ដោយក្រុមតន្ត្រីប្រពៃណីដ៏មានទេពកោសល្យរបស់ជនជាតិកូរ៉េមួយមានឈ្មោះថា “ចងកាអាក់ហូ” ដែលត្រូវបានបង្កើតឡើងកាលពីឆ្នាំ២០០០។ តន្ត្រីនេះ ទទួលបានភាពល្បីល្បាញខ្លាំង ព្រោះតែការធ្វើទំនើបកម្ម ទាំងទ្រង់ទ្រាយ និងសំឡេងដែលលាយឡំនឹងភាពសហសម័យមួយផងដែរ។
គួរបញ្ជាក់ផងដែរថា កូរ៉េ-កម្ពុជាបានបង្កើនការអភិវឌ្ឍរួមគ្នា តាមរយៈការជំរុញជំនួញ និងការវិនិយោគរបស់ប្រទេសទាំងពីរឲ្យកាន់តែមានប្រសិទ្ធភាព។ កិច្ចទំនាក់ទំនងការទូត រវាងកម្ពុជា-កូរ៉េ ពិតជាមានសារៈសំខាន់ ក្នុងកិច្ចអភិវឌ្ឍន៍វិស័យសេដ្ឋកិច្ច រវាងប្រទេសទាំងពីរ ដោយសារការអភិវឌ្ឍទំនាក់ទំនងនេះហើយទើបធ្វើឲ្យកម្ពុជាអភិវឌ្ឍន៍រហូតមកដល់សព្វថ្ងៃ ។
ប្រទេសកម្ពុជាចង់ឲ្យមានការអភិវឌ្ឍច្រើន គឺត្រូវតែមានបច្ចេកវិទ្យាទំនើប ដែលនៅក្នុងនោះ ត្រូវតែមានប្រព័ន្ធដឹកជញ្ជូន ដូចជាផ្លូវថ្នល់ ដើម្បីដឹកជញ្ជូន និងកំពង់ផែក្នុងការនាំចេញនាំចូលតាមផ្លូវសមុទ្រ រួមទាំងផ្លូវដែក៕ វឌ្ឍនា
