សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ប្រុសម្នាក់បើកបរម៉ូតូមួយគ្រឿងខ្វះការប្រុងប្រយ័ត្ន ព្យាយាមបើកជែងរថយន្តដឹកស្រាបៀរ ពីខាងស្តាំ ស្រាប់តែថយន្តបត់ចូលឃ្លាំងធ្វើឲ្យអ្នកបើកបរម៉ូតូចាប់ហ្វ្រាំងមិនទាន់ ដួលចូលក្រោមរថយន្ត ធ្វើឲ្យអ្នកបើកបរម៉ូតូរងរបួសស្រាល។
ហេតុការណ៍នេះកើតឡើងកាលពីវេលាម៉ោង១០និង១៥នាទីយប់ ថ្ងៃទី២៦ ខែតុលា ឆ្នាំ២០១៧ ត្រង់ចំណុចជិតខារ៉ាអូខេយីហោទីក្រុងសប្បាយ តាមបណ្តោយផ្លូវ២០០៤ ស្ថិតក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។
សាក្សីនៅកន្លែងកើតហេតុបានឲ្យភ្នាក់ងារយកព័ត៌មាននគរវត្តដឹងថា នៅមុនពេលកើតហេតុ គេឃើញបុរសម្នាក់បើកបររថយន្តមួយគ្រឿងម៉ាក ហ៊ីយនដាយ ពណ៌ក្រហម ជាប្រភេទរថយន្ត៣ភ្លៅ ដឹកស្រាបៀរភ្នំពេញរបស់ក្រុមហ៊ុនឯកជន ពាក់ស្លាកលេខ ព្រះសីហនុ 3A-2391។ បើកបរដោយបុរសម្នាក់ ទើបតែដឹកស្រាបៀរភ្នំពេញចេញមកពីខេត្តកំពង់ឆ្នាំង បំណងបើកទៅឃ្លាំងនៅកន្លែងកើតហេតុ ដោយធ្វើដំណើរតាមបណ្តោយផ្លូវ២០០៤ ក្នុងទិសដៅពីលិចទៅកើត។
លុះមកដល់ចំណុចកើតហេតុ ក៏បានស៊ីញ៉ូបំរុងបត់ស្តាំចូលទៅក្នុងឃ្លាំង ខណៈនោះស្រាប់តែមានម៉ូតូបើកមកពីក្រោយមួយគ្រឿងទៀតម៉ាក ស៊ុយស័រគីនិច ពណ៌ខ្មៅ លាយក្រហម ពាក់ស្លាកលេខ ភ្នំពេញ 1CH-6179 បើកបរដោយបុរសម្នាក់ ក្នុងល្បឿនលឿន ហើយព្យាយាមជែងខាងស្តាំរថយន្ត ដោយខ្វះការប្រុងប្រយ័ត្ន ក៏ត្រូវបានរថយន្តបត់ស្តាំបណ្តាលឲ្យកៀរម៉ូតូចូលទៅក្រោមរថយន្ត កិនអូសរងការខូចខាតយ៉ាងដំណំ រីឯអ្នកបើកបរម៉ូតូរងរបួសស្រាល ចំណែកឯរថយន្តការខូចខាតបន្តិចបន្តូច។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ចំណុចកើតហេតុ ហើយបានទាក់ទងទៅសមត្ថកិច្ចជំនាញចរាចរណ៍ឲ្យចុះមកវាស់វែងយករថយន្ត និងម៉ូតូទៅរក្សាទុកនៅអធិការដ្ឋាននគរបាលខណ្ឌសែនសុខដើម្បីរង់ចាំដោះស្រាយគ្នានៅពេលក្រោយ៕ តុង សីហា
