សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរស និងស្រ្តី២នាក់បើកម៉ូតូចៀសពីរថយន្តមួយគ្រឿង ត្រូវម៉ូតូមួយគ្រឿងទៀត បុកបណ្តាលឲ្យរងរបួសធ្ងន់២នាក់ និងស្រាល១នាក់ ត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ។
ហេតុការណ៍នេះបង្កឲ្យមានការភ្ញាក់ផ្អើលកាលវេលាម៉ោង ៩និង២០នាទីយប់ ថ្ងៃទី២៦ ខែតុលា ឆ្នាំ២០១៧ នៅតាមបណ្តោយផ្លូវធ្យូអឹមអាយ( QMI )ភូមិជម្ពូវន្ត សង់្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ម៉ូតូមួយគ្រឿងម៉ាកឌ្រីម សង់ សេរ៊ី២០១៧ ពណ៌ខ្មៅ ពាក់ស្លាកលេខ តាកែវ1M- 7249 ជិះដោយបុរស និងស្រ្តី២នាក់ មិនស្គាល់អត្តសញ្ញាណ។ ចំណែកឯម៉ូតូមួយគ្រឿងទៀត ម៉ាកឌ្រីម សង់សេរ៊ី ២០១៦ ពាក់ស្លាកលេខ ភ្នំពេញ FO-8452 ។
សាក្សីនៅកន្លែងកើតហេតុបានប្រាប់ភ្នាក់ងារយកព័ត៌មាននគរវត្តថា គេឃើញម៉ូតូមួយគ្រឿង ម៉ាកឌ្រីមសង់់ សេរ៊ី ឆ្នាំ២០១៧ ជិះគ្នា២នាក់ប្តីប្រពន្ធបើកក្នុងទិសដៅពីត្បូងទៅជើង។ លុះបើកមកដល់ចំណុចកើតហេតុ ដោយមានរថយន្តមួយគ្រឿងពណ៌ស មិនស្គាល់ម៉ាក ដែលចតស្របជាមួយខាងលើ ក្នុងទិសដៅពីត្បូងទៅជើង ហើយបន្ទាប់មកប្តី និងប្រពន្ធខាងលើបានបើកចៀសទៅខាងឆ្វេង បានបន្តិច ស្រាប់តែឃើញម៉ូតូមួយគ្រឿង បើកបោះពួយយ៉ាងលឿន ក្នុងទិសដៅបញ្ច្រាសគ្នា ពេលនោះ ម៉ូតូ២នាក់ប្តីប្រពន្ធខាងលើបានបើកគេចទៅខាងស្តាំវិញ តែគេចមិនផុត ត្រូវម៉ូតូម៉ាកឌ្រីមសង់សេរ៊ី២០១៦បុកចំពាក់កណ្តាលពេញទំហឹងបណ្តាលឲ្យដួលនឹងថ្នល់ត្រូវបុរសជាប្តីបែកក្បាលហូរឈាមសន្លប់ស្តូកស្តឹង នៅកន្លែងកើតហេតុហើយប្រពន្ធរងរបួសស្រាល ។
បន្ទាប់មកបុរសជាប្តីត្រូវបានរថយន្តសង្គ្រោះសម្ភព រស្មី ដឹកយកទៅព្យាបាល។ ចំណែកម្ចាស់ ម៉ូតូមួយគ្រឿងទៀតបែកក្បាលសន្លប់ស្តូកស្តឹងត្រូវរថយន្តសាមុយសម្ភព រស្មី ដឹងយកទៅបន្តបន្ទាប់។
ក្រោយពេលកើតហេតុកម្លាំងនគរបាលមូលដ្ឋាន បានទៅដល់វាស់វែង និងយកទៅរក្សាទុករង់ចាំដោះស្រាយពេលក្រោយ៕ សុខាសែនជ័យ
