សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀងៈ និស្សិតប្រុស ស្រី២នាក់បានរងរបួសធ្ងន់ស្រាល ខណៈជិះម៉ូតូត្រូវរថយន្តមួយគ្រឿងបើកបញ្ច្រាសមិនប្រកាន់ស្ដាំ បុកយ៉ាងពេញទំហឹងបង្កឲ្យមានការភ្ញាក់ផ្អើលដល់អ្នកភូមិ ក៏ដូចជាអ្នកធ្វើដំណើរឈប់ និងរាយការណ៍មកសមត្ថកិច្ចមូលដ្ឋានមកដឹកមកកាន់មន្ទីរពេទ្យកាលពីវេលាម៉ោង៩យប់ ថ្ងៃទី២៧ ខែតុលា ឆ្នាំ២០១៧ លើផ្លូវលេខ ២០៨ ស្ថិតក្នុងភូមិ ស្រះវង់ សង្កាត់ ស្វាយរៀង ក្រុងស្វាយរៀង ខេត្តស្វាយរៀង។
សមត្ថកិច្ចនគរបាលប៉ុស្តិ៍រដ្ឋបាលបានឲ្យសារព័ត៌មាននគរវត្តដឹងថា ជនរងគ្រោះទាំង២នាក់មានឈ្មោះ ហ៊ សំណាង អាយុ ២៥ ឆ្នាំ មុខរបរ និស្សិត រស់នៅភូមិ ចុងព្រែក សង្កាត់ ស្វាយរៀង ក្រុង ស្វាយរៀងនិងអ្នករួមដំណើឈ្មោះ សុន កក្ដដា អាយុ ២២ ឆ្នាំ មុខរបរ និស្សីត រស់នៅភូមិ ព្របាក់ករ ឃុំ ព្រៃធំ ស្រុក កំពង់រោទិ៍ ខេត្ត ស្វាយរៀង ចំណែកម៉ូតូម៉ាក ហុងដាសេ១២៥ ពណ៌ ខ្មៅ ពាក់ផ្លាកលេខ ស្វាយរៀង ១D ០៣៦៨ ខូចខតយ៉ាងដំណំ។
ប្រភពដដែលបានប្រាប់នគរវត្តទៀតថា រីឯអ្នកបើករថយន្តម៉ាក បាឡែន ពណ៌ ទឹកប្រាក់ មិនចាំស្លាកលេខ មិនត្រូវបានស្គាល់អត្តសញាណនោះទេ ក្រោយពេលដែលឃើញសភាពការណ៍មិនស្រួល បានបើករត់គេចភ្លាមៗបាត់ស្រមោលផងដែរ។
សាក្សីឃើញហេតុការណ៍ផ្ទាល់ភ្នែកបានឲ្យភ្នាក់ងារព័ត៌មាននគរវត្តដឹងថា មុនកើតហេតុ មានប្រុសស្រី២នាក់ បានជិះម៉ូតូមួយគ្រឿងម៉ាក ហុងដាសេ ១២៥ ពណ៌ ខ្មៅ ដោយធ្វើដំណើរពីត្បូងទៅជើង លើផ្លូវលេខ២០៨ ខណៈនោះស្រាប់តែមានរថយន្ដម៉ាក បាឡែន ពណ៌ ទឹកប្រាក់ មិនស្គាល់ស្លាកលេខ ជិះពីជើងទៅត្បូង បញ្ច្រាសទិសគ្នាមិនប្រកាន់ស្ដាំ ក៏បុកពេញទំហឹង បង្កឲ្យមានការភ្ញាក់ផ្អើលដល់អ្នកភូមិចេញមកមើល និងរាយការណ៍មកសមត្ថកិច្ចភ្លាមៗ។
បន្ទាប់មកស្រាប់តែឃើញអ្នកបើករថយន្តបើកគេចខ្លួន បន្សល់ទុកអ្នកជិះម៉ូតូដួលបែកក្បាលហូរឈាមនៅនឹងកន្លែង ត្រូវបានគេដឹកមកសង្គ្រោះនៅមន្ទីរពេទ្យបង្អែកខេត្តស្វាយរៀង។
ចំពោះមធ្យោបាយត្រូវបានសមត្ថកិច្ចនគរបាលវាស់វែង និងអូសយកមក រក្សាទុកនៅអធិការដ្ឋាននគរបាលក្រុងស្វាយរៀងដើម្បីដោះស្រាយតាមច្បាប់៕ យឹម សុថាន
