ស្រវឹងស្រាបើកបរមិនប្រកាន់ស្ដាំបុករថយន្ដពេញទំហឺងដួលសន្លប់ស្ដូក

ខេត្តស្វាយរៀង៖ បុរសស្រវឹងស្រាម្នាក់ បានរងរបួសសន្លប់ស្ដូកស្ដឹង ខណៈដែលជួបករណីគ្រោះថ្នាក់ចរាចរណ៏ដោយជិះម៉ូតូមិនប្រកាន់ស្ដាំទៅបុកនឹងរថយន្ដម៉ាក ហុីយ៉ាន់ដាយ ពេញទំហឺង កាលពីវេលាម៉ោង១០និង៥០នាទីព្រឹក ថ្ងៃទី៥ ខែវិច្ឆិកា ឆ្នាំ២០១៧ លើផ្លូវលេខ ៣១៥C ស្ថិតក្នុងភូមិ គយត្របែក សង្កាត់ គយត្របែក ក្រុងស្វាយរៀង។

សមត្ថកិច្ចនគរបាលក្រុងស្វាយរៀងបានឲ្យសារព័ត៌មាននគរវត្តដឹងថា បុរសដែលរងរបួសមានឈ្មោះ គង់ រ៉ាយូ អាយុ ២៦ ឆ្នាំ មុខរបរ កសិករ រស់នៅភូមិ សាលារៀង ឃុំ បាសាក់ ស្រុក ស្វាយជ្រំ ខេត្ត ស្វាយរៀង ខណៈជិះម៉ូតូម៉ាក SUZUKI VIVA ពណ៌ ក្រហម ពាក់ស្លាកលេខ ភ្នំពេញ ១AM ២២៦៩ខូចខាតយ៉ាងដំណំ។

ចំណែកអ្នកបើករថយន្ដម៉ាក ហុីយ៉ាន់ដាយ ពណ៌ ស ពាក់ស្លាកលេខ ភ្នំពេញ ២H ៨៣៧០ មានឈ្មោះ ប៉ុល ឡាង ភេទ ប្រុស អាយុ ៣៩ មុខរបរ លក់ដូរ រស់នៅភូមិ ព្រៃផ្ដៅ ឃុំ មុខដា ស្រុក រមាសហែក ខេត្ត ស្វាយរៀង។

តាមសាក្សីបានឲ្យដឹងថា មុនកើតហេតុ មានបុរសម្នាក់បានជិះម៉ូតូមួយគ្រឿង លើផ្លូវលេខ ៣១៥Cពី ជើងទៅត្បូង ដោយអការស្រវឹងស្រា ស្រាប់តែទៅបុករថយន្ដម៉ាក ហុីយ៉ាន់ដាយទិសដៅបញ្ច្រាសគ្នាពេញទំហឹងបណ្ដាលឲ្យដួលខ្ទាតមនុស្ស និងម៉ូតូលើចិញ្ចើមផ្លូវតែម្ដង។

ក្រោយមកសមត្ថកិច្ចនគរបាលក្រុងបានដឹកជនរងគ្រោះមកសង្គ្រោះនៅមន្ទីរពេទ្យខេត្តស្វាយរៀង និងវាស់វែងអូសមធ្យោបាយទាំង២គ្រឿងទៅរក្សាទុកនៅអធិការនគរបាលក្រុងស្វាយរៀងចាត់ការបន្តតាមច្បាប់៕ យឹម សុថាន