សារព័ត៌មាន នគរវត្ត តែងតែនាំមុខគេជានិច្ច
ប្រភពពីប្រជាពលរដ្ឋនៅភូមិគ្រញូងសែនជ័យ ឃុំ២ធ្នូ ស្រុកស្នួល ខេត្តក្រចេះ បានឲ្យដឹងថា ក្នុងមូលដ្ឋានពួកគាត់ដែលគ្រប់គ្រងដោយយោធាវរការពារព្រំដែន២០៤ កំពុងកើតមានសង្វៀនបញ្ជល់មាន់២កន្លែងដំណើរការយ៉ាងរលូន ហើយក៏មានបទល្មើសដឹកជញ្ជូនឈើប្រណីតចេញទៅប្រទេសវៀតណាមតាមច្រកង៉ាំ០៦យ៉ាងអនាធិបតេយ្យដែរ។ ប្រភពពីមន្ត្រីអាជ្ញាធរមូលដ្ឋានបានឲ្យដឹងថា ពួកគេមិនហ៊ានបង្ក្រាបសង្វៀនបញ្ជល់មាន់ដែលកំពុងធ្វើឲ្យប៉ះពាល់ដល់សន្តិសុខសង្គមនោះទេ ព្រោះអ្នកបើកល្បែងស៊ីសងសុទ្ធតែជាមន្ត្រីយោធា។ ក្នុងនោះលោក ហ៊ត ប៊ុនគីម មេបញ្ជាការយោធាគ៣ចំណុះវរការពារព្រំដែនលេខ២០០៤ បើកសង្វៀនបញ្ជល់មាន់និងបាញ់អាប៉ោង១កន្លែង ចំណែកឈ្មោះ ជា ណាក់ បញ្ជាការរងគ៣ បានបើកសង្វៀនបញ្ជល់មាន់មួយកន្លែងដែរនៅចំណុចទល់មុខបន្ទាយគ៣ ប្រហែល១០០០ម៉ែត្រ។
តាមការអះអាងរបស់ប្រជាពលរដ្ឋនៅក្នុងភូមិគ្រញូងសែនជ័យ ដែលមានព្រំប្រទល់ជាប់ជាមួយស្រុកកែវសីមា ខេត្តមណ្ឌលគិរី បានឲ្យដឹងថាសង្វៀនបញ្ជល់មាន់របស់លោក ហ៊ត ប៊ុនគីម និងលោក ជា ណាក់ ដែលមានល្បែងអាប៉ោងផងនោះ កំពុងដំណើរការយ៉ាងរលូនហើយមានអ្នកចូលលេងល្បែងយ៉ាងគគ្រឹកគគ្រេង។ រហូតមកដល់ពេលនេះអាជ្ញាធរមិនទាន់ចាត់វិធានការបង្ក្រាបសង្វៀនបញ្ជល់មាន់របស់លោក ហ៊ត ប៊ុនគីម និងលោក ជា ណាក់ នៅឡើយទេ។ ប្រជាពលរដ្ឋសង្ស័យថាអភិបាលស្រុកស្នួល និងអធិការនគរបាលស្រុកស្នួល ទំនងជាទទួលបានផលប្រយោជន៍ពីអ្នកបើកល្បែងស៊ីសងទើបបណ្ដោយឲ្យល្បែងបញ្ជល់មាន់និងអាប៉ោងកើតឡើងយ៉ាងរាលដាលនៅក្នុងភូមិគ្រញូងសែនជ័យ៕
