សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្រុមចោលឆក់មួយក្រុម បានធ្វើសកម្មភាពឆក់កាបូបពីនារីរងគ្រោះពេញទំហឹង បណ្តាលឲ្យដួលបោកក្បាលទៅនឹងថ្នល់រងរបួសធ្ងន់ ត្រូវបានរថយន្តសាម៉ុយដឹកបញ្ជូនទៅសង្គ្រោះបន្ទាន់ភ្លាមៗ ។ ហេតុការណ៍នេះកើតឡើងនៅវេលាម៉ោង ៧ និង ៤០នាទីយប់ ថ្ងៃទី២១ ខែវិច្ឆិកា ឆ្នាំ២០១៧ តាមបណ្តោយមហាវិថី សហព័ន្ធរុស្សី ក្បែរផ្សារបាយ័ន ស្ថិតក្នុងសង្កាត់មនោរម្យ ខណ្ឌ៧មករា រាជធានីភ្នំពេញ ។
បើតាមប្រភពព័ត៌មានពីកន្លែងកើតហេតុបានឲ្យដឹងថា គេបានឃើញស្រ្តី២នាក់ ជិះម៉ូតូ ១គ្រឿង ម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខភ្នំពេញ 1N-5449 ធ្វើដំណើរតាមបណ្តោយមហាវិថីសហព័ន្ធរុស្សី ក្នុងទិសដៅពីលិចទៅកើត ខណៈមកដល់កន្លែងកើតហេតុខាងលើក្បែរផ្សារបាយ័ន ស្រាប់តែលេចមុខជនសង្ស័យមួយក្រុមមានគ្នា ៦ ទៅ ៧នាក់ បានជិះម៉ូតូ ៤គ្រឿងមួយសន្ទុះក្រោយមក ស្រាប់តែបានជិះម៉ូតូចូលមកជិតម៉ូតូជនរងគ្រោះកៀបទាំងសងខាង ហើយក៏បានធ្វើសកម្មភាពឆក់កាបូបពីជនរងគ្រោះពេញទំហឹង តែមិនបានសម្រេច បណ្តាលឲ្យជនរងគ្រោះម្នាក់ដែលអង្គុយខាងក្រោយដួលបោកក្បាលទៅនឹងថ្នល់រងរបួសធ្ងន់ ត្រូវបានរថយន្តសាម៉ុយដឹកបញ្ជូនទៅសង្គ្រោះបន្ទាន់ភ្លាមៗ។
ចំណែកក្រុមជនសង្ស័យក៏បាននាំគ្នាជិះម៉ូតូគេចខ្លួនបាត់ស្រមោលពីកន្លែងកើតហេតុដោយសុវត្ថិភាពតែមង្ត ៕ ស រស្មី
