សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ មុខសញ្ញាគ្រឿងញៀនម្នាក់ទៀតត្រូវនគរបាលស្រុកកំពង់សិលាចាប់ខ្លួន ជាមួយនឹងថ្នាំញៀនចំនួន២៨កញ្ចប់ នៅវេលាម៉ោងប្រមាណ០៣និង១៥នាទីរសៀលថ្ងៃទី២ខែធ្នូ ឆ្នាំ២០១៧ ត្រូវបានសមត្ថកិច្ចនគរបាលស្រុកកំពង់សិលា បានបង្រ្កាបបទល្មើសគ្រឿងញៀនមួយករណី នៅតាមផ្លូវជាតិលេខ៤ ស្ថិតក្នុងភូមិបឹងត្រាច ឃុំចំការហ្លួង ស្រុកកំពង់សិលា ខេត្តព្រះសីហនុ ឃាត់ខ្លួនជនសង្ស័យម្នាក់ ឈ្មោះ កែវ ផានិត ភេទប្រុស អាយុ១៧ឆ្នាំ មុខរបរជាសិស្ស មានទីលំនៅភូមិកំពង់កណ្តាល ឃុំកំពង់បាយ ស្រុកកំពត ខេត្តកំពត។ សមត្ថកិច្ចចាប់យកបានថ្នាំញៀនមេតំហ្វេតាមីនចំនួន២៨កញ្ចប់ (៧កញ្ចប់ធំ និង ២១កញ្ចប់តូច)។
តាមការឲ្យដឹងពីលោកវរសេនីយ៍ទោហួត ចន្ធី អធិការនគរបាលស្រុកកំពង់សិលា បានបញ្ជាក់ថា មុខសញ្ញាគ្រឿងញៀនម្នាក់នេះ មិនមែនជាមនុស្សនៅក្នុងមូលដ្ឋានឡើយ ជាមនុស្សមកពីចំងាយ មានសកម្មភាពគួរឲ្យសង្ស័យ សមត្ថកិច្ចបានតាមដានហើយឃាត់ខ្លួន មកសួរនាំទើបបែកធ្លាយរកឃើញថ្នាំញៀនតែម្តង។
បច្ចុប្បន្នសមត្ថកិច្ច ជំនាញកំពុងកសាងសំណុំរឿងតាមនីតិវិធីបញ្ជូនទៅសាលាដំបូង៕ ឆ្លាម សមុទ្រ
