សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ កម្លាំងជំនាញនៃអធិការដ្ឋាននគរបាលស្រុកចំការលើ បានបើកកិច្ច ប្រតិបត្តិការចុះចាប់ខ្លួនជនសង្ស័យ ដែលជាមុខសញ្ញាជួញដូរថ្នាំញៀនម្នាក់ តាមដីកា កាលពីវេលាម៉ោង៥និង៣០នាទី ថ្ងៃសុក្រ ៥រោច ខែមិគសិរ ឆ្នាំរកា ព.ស២៥៦១ ត្រូវនឹងថ្ងៃ ទី៨ ខែធ្នូ ឆ្នាំ២០១៧ នៅចំណុចភូមិអូរតាសែង ឃុំតាប្រុក ស្រុកចំការលើ ខេត្តកំពង់ចាម ។
មន្ត្រីនគរបាលស្រុកចំការលើបានឲ្យដឹងថា ជនសង្ស័យដែលរងការចាប់ខ្លួនឈ្មោះ នាង ទិត្យា ហៅ យ៉ា ភេទប្រុស អាយុ២២ឆ្នាំជាតិខ្មែរ មានទីលំនៅភូមិអូរតាសែង ឃុំតាប្រុក ស្រុកចំការលើ ខេត្តកំពង់ចាម ។
សមត្ថកិច្ចបន្តថា ការចាប់ខ្លួនជនសង្ស័យធ្វើឡើងតាមដីកាបង្គាប់ឲ្យចាប់ខ្លួនលេខ៦៣៥៩ ត.ព្រ ចុះថ្ងៃទី៧ ខែវិច្ឆិកា ឆ្នាំ២០១៧ ចេញដោយលោក នៅ យ៉ារ័ត្ន ចៅក្រមស៊ើបសួរ សាលាដំបូងខេត្តកំពង់ចាម ពីបទ «ជួញដូរដោយខុសច្បាប់នូវសារធាតុញៀន» ដែលបាន ប្រព្រឹត្តនៅភូមិអូរតាសែង ឃុំតាប្រុក ស្រុកចំការលើ ខេត្តកំពង់ចាម កាលពីថ្ងៃទី៩ ខែកញ្ញា ឆ្នាំ២០១៧ ។
បច្ចុប្បន្នជនសង្ស័យ ត្រូវបានសមត្ថកិច្ចកសាងសំណុំរឿងបញ្ជូនបន្តទៅសាលាដំបូងខេត្ត ដើម្បី ផ្តន្ទាទោសតាមច្បាប់ ៕ វណ្ណៈ
