សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ ស្រ្តីវ័យចំណាស់ម្នាក់ត្រូវបានឆ្លងចរន្តអគ្គីសនីឆក់ស្លាប់យ៉ាងអាណោចអាធ័ម នៅគ្រាដែលស្រ្តីរងគ្រោះបានចូលទៅងូតទឹក។
ហេតុការណ៍ខាងលើបានបង្កការភ្ញាក់ផ្អើលឡើង នៅវេលាម៉ោង៧ និង១០នាទីយប់ ថ្ងៃសុក្រ ៥រោច ខែមិកសិរ ឆ្នាំរកា នព្វស័ក.ព.ស ២៥៦១ ត្រូវនឹងថ្ងៃទី០៨ ខែធ្នូ ឆ្នាំ២០១៧ ត្រង់ចំណុចក្នុងបន្ទប់ទឹកក្បែផ្ទះ ស្ថិតក្នុងភូមិពោធិ៍ដំណាក់ ឃុំវាល ស្រុកកណ្ដៀង ខេត្តពោធិ៍សាត់។
ប្រភពព័ត៌មានពីអាជ្ញាធរមានសមត្តកិច្ចបានឲ្យដឹងថា ជនរងគ្រោះ(ស្លាប់)ឈ្មោះ ពៅ ហាង ភេទស្រី អាយុ ៥៦ឆ្នាំ ជនជាតិខ្មែរ រស់នៅភូមិ.ឃុំកើតហេតុខាងលើ។
ប្រភពព័ត៌មានខាងលើបន្តថា ស្រ្តីរងគ្រោះដោយឆ្លងចរន្តអគ្គីសនីឆក់(ស្លាប់)នេះ នៅគ្រាដែលគាត់បានចូលទៅងូតទឹកក្នុងបន្ទប់ដូចបានរាបរប លុះងូតទឹករួចរាល់គាត់បានបើកទ្វារចេញ ប៉ុន្តែជាអកុសល់នៅពេលដែលគាត់បើកទ្វារចេញនោះ ខ្លួនប្រាណទទឹកជោគចំខ្សែភ្លើងកិតជាមួយស័ង្កសីផងនោះ បានឆ្លងចរន្តអគ្គីសនីឆក់ស្លាប់យ៉ាងរន្ធត់បែបនេះតែម្តង។
ប្រភពព័ត៌មានដដែលខាងលើបន្តទៀតថា ក្រោយកើតហេតុបន្ទប់ពីនគរបាលជំនាញទទួលបានព័ត៌មានភ្លាម បានសហការគ្នាចុះដល់កន្លែងកើតហេតុដើម្បីធ្វើការពិនិត្យ លទ្ធផល៖ លើខ្លួនប្រាណសាកសពពុំមានស្លាកស្នាមអ្វីគួរឲ្យសង្ស័យ ជាប់ពាក់ព័ន្ធក្នុងករណីឃាតកម្មអ្វីនោះឡើយ ទើបធ្វើកំណត់ហេតុប្រគល់សាកសពជូនក្រុមគ្រួសារ ចាត់ចែងយកទៅធ្វើបុណ្យតាមនីតិវិធីប្រពៃណី៕ បឹុម ពិន
