សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ២នាក់ ត្រូវកម្លាំងនគរបាលប៉ុស្តិ៍ផ្សារដេប៉ូទី២ ធ្វើការឃាត់ខ្លួន បន្ទាប់ពីពួកគេបានទិញថ្នាំញៀនយកមកប្រើប្រាស់ កាលពីព្រឹក ថ្ងៃសៅរ៍ ១៣រោច ខែមិគសិរ ឆ្នាំរកា ព.ស.២៥៦១ ត្រូវនឹងថ្ងៃទី១៦ ខែធ្នូ ឆ្នាំ២០១៧ ប្រព្រឹត្តនៅចំណុចផ្ទះលេខ១១៨ ផ្លូវ១៣៤ ក្រុម៩ ភូមិ៣ សង្កាត់ទឹកផ្សារដេប៉ូ២ ខណ្ឌទួលគោក រាជធានីភ្នំពេញ ។
មន្រ្តីនគរបាលខណ្ឌទួលគោក បានឲ្យដឹងថា ជនសង្ស័យទាំង២នាក់នេះ ទី១. ឈ្មោះ ចាន់ ឌី ភេទប្រុស អាយុ២៥ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅមិនពិតប្រាកដ។ ទី២. ឈ្មោះ ទ្រៀវ សំណាង ភេទប្រុស អាយុ៣០ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅមិនពិតប្រាកដ ។ វត្ថុតាងដែលបានចាប់យកមាន៖ ១-ទូរសព្ទចំនួន០១គ្រឿង ប្រើលេខ០៩៦៨៦៤៣៧៥៩ ។
ប្រភពដដែល បានបន្តទៀតថា មុនពេលឃាត់ខ្លួនគឺកម្លាំងល្បាតប៉ុស្តិ៍ បានជិះការពារសុវត្ថិភាពជូនប្រជាពលរដ្ឋក្នុងមូលដ្ឋាន លុះដល់ចំណុចខាងលើ ស្រាប់តែឃើញជនសង្ស័យ២នាក់ កំពុងតែដើរតាមផ្លូវដោយមានការសង្ស័យ ក៏ចាប់ឃាត់ខ្លួន និងយកមកពិនិត្យទឹកនោមរកឃើញសារធាតុញៀន ទើបបញ្ជូនមកអធិការដ្ឋាននគរបាលខណ្ឌទួលគោកតែម្តង ។
បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្តោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរ និងកសាងសំណុំរឿងបញ្ជូនទៅ សាលាដំបូងរាជធានីភ្នំពេញ ចាត់ការតាមផ្លូវច្បាប់ ៕ស តារា
